სახალხო დამცველი: სამართალდამცავებმა არაპროპორციული ძალა გამოიყენეს
ნინო ლომჯარიას თქმით, პოლიციას აქციის მონაწილეებისთვის არც გონივრული დრო მიუცია. ამასთან, მედიით გავრცელებული კადრები, მაგალითად, მშვიდობიანი მოქალაქეებისთვის თავის არეში რეზინის ტყვიის დამიზნებით სროლა მიუთითებს გარკვეულ შემთხვევებში სამართალდამცავების მხრიდან არაპროპორციული ძალის გამოყენებაზე. სახალხო დამცველის შეფასებითვე, ძალის გადამეტების სავარაუდო შემთხვევები იკვეთება დაკავებულებისგან მიღებული განმარტებებით და საჯაროდ გავრცელებული ვიდეომასალებით.
ნინო ლომჯარია ცალკე შეფასების საგნად მიიჩნევს მოვლენების გასაშუქებლად ადგილზე მყოფი ჟურნალისტებისთვის პროფესიულ საქმიანობაში ხელშეშლის, დაკავებისა და დაშავების ფაქტებს.
სახალხო დამცველის ინფორმაციით, აქციაზე დაკავებულთა საქმის განხილვა სასამართლოში მიმდინარეობს დაჩქარებულად და დაკავებულებს არ ეძლევათ სამართლიანი სასამართლოს უფლებით და ისეთი მნიშვნელოვანი პროცედურული გარანტიებით სარგებლობა როგორიცაა, მტკიცებულებების წარდგენა, ეფექტური დაცვის უფლება და საქმის გონივრულ ვადებში განხილვა.
სახალხო დამცველი მიმართავს გენერალურ პროკურატურას, დაიწყოს და ჩაატაროს ეფექტიანი გამოძიება არაპროპორციული ძალის გამოყენების, ასევე, დაკავებულების მიმართ ძალადობის სავარაუდო ფაქტებზე და დაიწყოს და აწარმოოს ეფექტიანი გამოძიება ჟურნალისტების მიმართ განხორციელებული ძალადობრივი ქმედებებისა და საქმიანობაში ხელშეშლის ფაქტების გარშემო.
ნინო ლომჯარია მიმართავს მთავრობას, სრულად ანაზღაურდეს აქციაზე დაზარალებულ პირთა მკურნალობისა და რეაბილიტაციის ხარჯები.
სახალხო დამცველი მიმართავს თბილისის საქალაქო სასამართლოსაც, აქციაზე დაკავებულ პირთა მიმართ სამართალწარმოება წარიმართოს ადამიანის უფლებების დაცვის სტანდარტების შესაბამისად.