ზაქარია ქუცნაშვილი: განსხვავებული შეხედულებების გამო ბატონი ბიძინა არავის დევნის
„ცოცხალი მაგალითი ვარ იმის, რომ განსხვავებული შეხედულებების გამო ბატონი ბიძინა არავის დევნის",- განაცხადა საპარლამენტო უმრავლესობის წევრმა ზაქარია ქუცნაშვილმა, ეკონომიკის მინისტრის გიორგი ქობულიას პოსტიდან წასვლის საკითხის კომენტირებისას.
„სად იყვნენ სხვები, როცა მე არათუ განსხვავებულ მოსაზრებებს, არამედ საწინააღმდეგო პოზიციას ვაფიქსირებდი ხშირ შემთხვევაში და ამას ჩემი და ბატონი ბიძინას ურთიერთობაზე, მეგობრობაზე, თანამშრომლობაზე გავლენა არ მოუხდენია. არ არის ეს კაცი ისეთი, როგორსაც ოპოზიცია წარმოაჩენს, რომ ის ადამიანებს დევნის განსხვავებული აზრის გამო. ყველა შემთხვევაში ის ითხოვს ახსნას, დასაბუთებას და ბევრჯერ გავმხდარვარ მოწმე იმისა, რომ ახსნილი და დასაბუთებული მოსაზრების შემთხვევაში მას შეუცვლია პოზიცია“,- აღნიშნა ზაქარია ქუცნაშვილმა. იგი ამბობს, რომ არ იცის რა გახდა გიორგი ქობულიას თანამდებობიდან გადაყენების მიზეზი.