TI: 51% თვლის, რომ კორუფციის შემთხვევებზე გამოძიება სათანადოდ არ ხდება
„საერთაშორისო გამჭვირვალობა - საქართველოს“ მიერ ჩატარებული საზოგადოებრივი აზრის კვლევის მიხედვით, გამოკითხულთა 51% თვლის, რომ კორუფციის შემთხვევებზე გამოძიება სათანადოდ არ ხდება, როდესაც საქმე მაღალი თანამდებობის პირებს ან მმართველ პარტიასთან დაკავშირებულ გავლენიან ადამიანებს ეხება.
გამოკითხულთა 33% თვლის, რომ ნაწილობრივ გავრცელებულია/ნაწილობრივ არა - საჯარო მოხელეების მიერ თავიანთი თანამდებობის ბოროტად გამოყენება (პირადი მიზნებისთვის); ხოლო 22% ამბობს, რომ უფრო გავრცელებულია, ვიდრე არა.
გამოკითხულთა უმრავლესობა (98%) ამბობს, რომ ბოლო 1 წლის განმავლობაში, ფულადი ან არაფულადი ქრთამის გადახდის მოთხოვნის შემთხვევა არ ჰქონია.
ხოლო გამოკითხულთა მხოლოდ 1% ამბობს, რომ მათ ან მათი ოჯახის წევრებს სახელმწიფო მომსახურების სანაცვლოდ ქრთამის გადახდა მოსთხოვეს.
კვლევა „საერთაშორისო გამჭვირვალობა - საქართველოს“ დაკვეთით „კავკასიის კვლევითი რესურსების ცენტრმა” (CRRC) ჩაატარა.
კვლევა 2019 წლის 20 თებერვლიდან 5 მარტამდე პერიოდშია ჩატარებული. ქვეყნის მასშტაბით სულ გამოიკითხა 2 087 ადამიანი.