«Պետության համար կարևոր հարցերը լուծվում են գործադիրում, իսկ խորհրդարանը, ցավոք սրտի, քարոզչական գործիք է». Ա. Բաղդասարյան
«Խորհրդարանն այս տեսքն ունի իշխող ուժի մեղքով, բայց դա նրանք արել են իրենց քաղաքական նպատակահարմարությունից ելնելով, ի վնաս պետական շահի: Նիկոլ Փաշինյանը գտել է, որ իր համար ամենահարմար ընդդիմությունը կլինեն Ռոբերտ Քոչարյանը և Սերժ Սարգսյանը, որովհետև նրանք շատ խոցելի են և՛ իրենց անցյալով, և՛ իրենց քաղաքական թիմով: Ամեն անգամ, երբ նրանք փորձեն հարցեր բարձրացնել, նրանց …
The post «Պետության համար կարևոր հարցերը լուծվում են գործադիրում, իսկ խորհրդարանը, ցավոք սրտի, քարոզչական գործիք է». Ա. Բաղդասարյան appeared first on ԳԱԼԱ.
«Խորհրդարանն այս տեսքն ունի իշխող ուժի մեղքով, բայց դա նրանք արել են իրենց քաղաքական նպատակահարմարությունից ելնելով, ի վնաս պետական շահի: Նիկոլ Փաշինյանը գտել է, որ իր համար ամենահարմար ընդդիմությունը կլինեն Ռոբերտ Քոչարյանը և Սերժ Սարգսյանը, որովհետև նրանք շատ խոցելի են և՛ իրենց անցյալով, և՛ իրենց քաղաքական թիմով: Ամեն անգամ, երբ նրանք փորձեն հարցեր բարձրացնել, նրանց վրա ճնշումներ գործադրելը շատ հեշտ կլինի»,- ԳԱԼԱ-ի հետ զրույցում հայտարարեց քաղաքագետ Արմեն Բաղդասարյանը:
Ըստ քաղաքագետի՝ Նիկոլ Փաշինյանը երկու քայլով կոմբինացիա իրականացրեց:
«Նրանց որպես ընդդիմադիր «վերակենդանացրեց», պայքարեց նրանց դեմ, հաղթեց և նրանց բերեց խորհրդարան, որովհետև այդպես նա հայտնվել է շատ շահեկան վիճակում:
Այսօր մենք բազմաթիվ խնդիրներ ունենք մեր երկրի առջև, բայց այդ խնդիրների հարցում էլ շփման եզրեր չեմ տեսնում իշխող ուժի և ընդդիմադիրների միջև: Քանի դեռ նրանք չեն կարող ընդհանուր հայտարարի գալ, հետևաբար դժվար եմ պատկերացնում, որ կառուցողական համագործակցություն կլինի նրանց միջև»,- շարունակեց Բաղդասարյանը:
Ընդդիմադիր քաղաքական ուժի ներկայացուցիչները բազմիցս հայտարարել են, որ իշխանությանը «հանգիստ» չեն տալու, խոստացել են սուր քննադատություներ: Արդյո՞ք այս ընդդիմությունը կարող է զսպաշապիկ լինել իշխանության համար:
Անդրադառնալով հարցադրմանը՝ Արմեն Բաղդասարյանը հայտարարեց.
«Այն, ինչ ասում են ընդդիմադիր ուժերը, իրենց ֆունկցիան չէ: Իշխանությանը «հանգիստ» չթողնելը, նրանց հետևելը, նրանց գործունեությունը վերահսկելը, բացասական քայլերը հասարակության համար վեր հանելը լրատվամիջոցների ֆունկցիան է: Փաստորեն խորհրդարանական ընդդիմությունն ընդամենը ընդդիմադիր լրատվամիջոցի դեր է ստանձնել: Մինչդեռ նորմալ երկրներում հասարակությունը ընդդիմադիր ուժերից բոլորովին այլ ակնկալիքներ ունի:
Խնդիրը ո՛չ քննադատելն է, ո՛չ հայհոյելը, այլ այլընտրանքային ծրագրեր, ինչ-որ հարցերում այլընտրանքային լուծումներ առաջարկելն է, հասարակությանը համախմբելը:
Այսօրվա ընդդիմությունը հազիվ թե ունակ է դա անել, դրա համար էլ նրանք ստանձնել են ընդդիմադիր լրատվամիջոցի դեր, այսինքն՝ նրանք զուտ քարոզչություն են իրականացնում: Նույնն էլ վերաբերում է իշխող քաղաքական ուժին, նրանք նույնպես քարոզչությամբ են զբաղված, որովհետև որևէ այլ անելիք նրանք չունեն, և պետության համար կարևոր հարցերը լուծվում են գործադիրում, իսկ խորհրդարանը, ցավոք սրտի, քարոզչական գործիք է:
Ես համաձայն եմ այն տեսակետների հետ, որ Նիկոլ Փաշինյանը որևէ այլ կարծիք չի լսում, ինքն իր մասին շատ բարձր կարծիք ունի և վստահ է, որ իրեն որևէ մեկը սովորեցնելու բան չունի:
Բայց դա չի նշանակում, որ ընդդիմությունն անելիք չունի. նրանք գաղափարներ, այլընտրանքային ինչ-որ լուծումներ պիտի բարձրաձայն ներկայացնեն, եթե ոչ իշխանության, ապա գոնե հանրության համար:
Հանրությունը կիմանա, որ կան այսպիսի լուծումներ, և ժողովուրդը տարբեր մեխանիզմներով իր ձայնը կբարձրացնի, կաջակցի ընդդիմությանը»,- հայտարարեց քաղաքագետը:
«Ցավոք սրտի, տպավորությունն այնպիսին է, որ Հայաստանի առջև ծառացած խնդիրների վրա և՛ իշխանությունը, և՛ ընդդիմությունը թքած ունեն:
Երեք ուժերն էլ առաջնորդվում են իրենց կուսակցական շահերով, այսինքն՝ իշխող ուժը փորձում է պահել իշխանությունը, իսկ ընդդիմադիր 2 ուժերն ամեն գնով փորձում են վերցնել իշխանությունը, իսկ կարևորագույն խնդիրների վրա թքած ունեն:
Մենք դա տեսնում ենք իշխանությունների վարած կադրային քաղաքականության հարցերում, հատկապես արտաքին քաղաքական: Այդքան խնդիրներ ունենալով հանդերձ՝ մենք տեսնում ենք, որ կարևորագույն երկրում դեսպան են նշանակում բացարձակապես անփորձ մեկին, կամ արտգործնախարարի պարտականությունները կատարում է մարդ, ով մեր ռազմավարական դաշնակցի համար անընդունելի դեմք է»,- եզրափակեց քաղաքագետ Արմեն Բաղդասարյանը:
Անահիտ Չալիկյան
The post «Պետության համար կարևոր հարցերը լուծվում են գործադիրում, իսկ խորհրդարանը, ցավոք սրտի, քարոզչական գործիք է». Ա. Բաղդասարյան appeared first on ԳԱԼԱ.