Թրամփը կարծում է, որ Կիմ Չեն Ընի վատառողջ լինելու մասին հաղորդագրությունները չեն համապատասխանում իրականությանը
ԱՄՆ նախագահ Դոնալդ Թրամփը հայտարարել է, որ Հյուսիսային Կորեայի առաջնորդ Կիմ Չեն Ընի վատառողջ լինելու մասին լուրերը չեն համապատասխանում իրականությանը, գրում է CNBC-ն։
«Ես կարծում եմ, որ այդ տեղեկատվությունը չի համապատասխանում իրականությանը։ Ձեզ մի բան ասեմ․ կարծում եմ՝ նրանք (CNN -ը) սխալ հաղորդագրություն են հրապարակել։ Ես լսել եմ, որ նրանք հին տվյալներ են օգտագործել: Լսել եմ նաև, որ դա սխալ տեղեկատվություն է, և հույս ունեմ, որ իրոք այդպես է»,- ասել է Թրամփը։
Ավելի վաղ Թրամփը հայտարարել էր, որ «շատ լավ հարաբերություններ» ունի Հյուսիսային Կորեայի առաջնորդի հետ և Կիմ Չեն Ընին առողջություն էր մաղթել։
«Մենք շատ լավ հարաբերություններ ունենք։ Կարող եմ միայն ասել, որ նրան ամենայն բարիք եմ մաղթում»,- ասել էր Թրամփը Սպիտակ տանը կայացած ճեպազրույցի ժամանակ:
Ավելի վաղ հաղորդվել էր, որ Հյուսիսային Կորեայի ղեկավար Կիմ Չեն Ընն ամսվա սկզբին սրտի վիրահատություն է տարել և այժմ վերականգնվում է իր մասնավոր առանձնատանը:
Հաղորդվում է, որ ԿԺԴՀ-ի առաջնորդը 2019 թվականի օգոստոսից իրեն վատ է զգացել սիրտ-անոթային համակարգի հետ կապված խնդիրների պատճառով։ Վերջին ամիսներին Կիմ Չեն Ընի առողջությունը վատացել է ծխելու, ճարպակալման և գերծանրաբեռնվածության պատճառով։