Թեև Փաշինյանի տեսաուղերձի կադրերի արտահոսքի մեղավորությունը նրա թիմինն էր, բայց քավության նոխազ դարձան Հ1-ի՝ աշխատանքից ազատված անձինք. պատճառն իշխանությունում տիրող խառնաշփոթն է. քաղտեխնոլոգ
Թեև վարչապետ Նիկոլ Փաշինյանի տեսաուղերձի կադրերի արտահոսքի հիմնական մեղավորությունը վարչապետի աշխատակազմինն էր, բայց քավության նոխազ դարձան Հանրային հեռուստաընկերությունում աշխատանքից ազատված անձինք: Այս մասին Tert.am-ի հետ զրույցում ասաց քաղտեխնոլոգ Վիգեն Հակոբյանը՝ նշելով, թե վարչապետի ու նրա խոսնակի մեղադրական սլաքներն առնվազն բարոյական ճնշման առումով ազդեցություն ունեցան Հանրայինի պաշտոնյաների՝ աշխատանքից ազատման վրա:
Հիշեցնենք, որ կադրերի արտահոսքից հետո երեկ Հ1-ի գործադիր տնօրենի պաշտոնից հրաժարական ներկայացրեց Մարգարիտա Գրիգորյանը, իսկ այսօր հայտնի դարձավ, որ իրենց դիմումների համաձայն՝ զբաղեցրած պաշտոններից ազատվել են նաև լրատվական ծառայության տնօրեն Պետրոս Ղազարյանը և հեռուստաընկերության պրոդյուսեր Վարդան Հակոբյանը։
«Հասանելի տեղեկատվությունից ակնհայտ է, որ տվյալ դեպքում առաջնային մեղավորությունը ոչ թե Հ1–ի անձնակազմինն էր, այլ՝ վարչապետի թիմինը: Կարծում եմ՝ վարչապետի թիմը որևէ արարողակարգով չի առաջնորդվել, թեև չի բացառվում, որ թերացումներ են եղել նաև հեռուստաընկերության աշխատանքում»,-նշեց Հակոբյանը:
Նրա խոսքով՝ կադրային որոշումները պայմանավորված էին որոշակի խառնաշփոթով, որ տիրում է իշխանության մեջ, քանի որ վերջինիս համար այժմ շատ ծանր ժամանակ է, ու առաջնային խնդիրը ոչ թե առողջապահական վիճակն է, այլ այն, որ իշխանությունը շատ լավ հասկանում է՝ բավականին ծանր սոցիալ-տնտեսական իրավիճակ է սպասվում:
«Այս իրավիճակում իշխանությունն սկսել է որոշակի ցայտնոտային վարքագիծ դրսևորել: Սովորական կադրեր էին, ու խնդիրը դրանց մեջ չէր: Վարչապետի թիմի համար զգայունն այն էր, որ իրավիճակը չէր վերահսկվում: Հերթական անգամ արձանագրվեց, որ չկա սահուն թիմ, որը կարող է նույնիսկ նման էլեմենտար բաներն ապահովել: Վարչապետի համար դա ցավալի էր, մանավանդ այս իրավիճակում, երբ իշխանության մեջ բոլորն անորոշ վիճակում են: Սա էլ լրացուցիչ դրվագ էր, որն այնպես հունից հանեց վարչապետին, որ նա դրան երկու օր անդրադառնում է ուղիղ եթերներով»,-ասաց քաղտեխնոլոգը:
Նա ընդգծեց՝ վարչապետն ու իշխանության ներկայացուցիչները շուրջ երկու տարի պնդել են՝ եթե կան հիասթափվածներ, դժգոհողներ, ապա նրանք միայն «նախկիններից» են, մինչդեռ այժմ Փաշինյանը խոսում է նոր հիասթափվածների շերտերի մասին: «Այժմ ոչ միայն նախկիններն են, այլև հոգևորականներ, սփյուռք, նաև լրատվամիջոցներ, վերլուծաբաններ: Հենց վարչապետն է փաստում, որ հիասթափվածների շերտերը զգալիորեն ավելացել են»,-նկատեց Հակոբյանը:
Նա ընդգծեց՝ անկախ նրանից՝ ՀՀ-ում կա՞ ընդդիմություն, թե՞ ոչ, ներկայիս ճգնաժամային իրավիճակն իշխանությունների թիվ մեկ ընդդիմությունն է, ինչը իշխանությանը լարված մթնոլորտում է պահում ու զգայուն դարձնում տարատեսակ իրավիճակների նկատմամբ: «Իշխանության առջև այժմ այնպիսի խնդիրներ են, որոնց լուծումները կամ չունի, կամ միայն որոշ չափով»: