Պետք է վերադառնալ բնականոն աշխատանքային ռեժիմի, տանը մնալու կոչերը ոչ մի լավ բանի չեն հանգեցնի. Վազգեն Սաֆարյան (տեսանյութ)
Կառավարությունն սկզբնապես նախատեսել էր 150 մլրդ դրամ հատկացնել տնտեսության պահպանման ուղղությամբ՝ մի քանի ուղղություններով, հատկապես՝ փոքր ու միջին բիզնեսին, բայց առկա միջոցները բավարար չեն մեր ձեռներեցներին օգնելու համար: «Արմնյուզ» ՀԸ «#ՕրաԽնդիր» հաղորդմանը նման կարծիք է հայտնել Հայրենական ապրանքարտադրողների միության նախագահ, Հանրային խորհրդի անդամ Վազգեն Սաֆարյանը:
«Միջազգային կառույցները մոտ 5 տրիլիոն դոլարի վարկեր կհատկացնեն ազգային տնտեսությունների պահպանման նպատակով: Մեր կառավարությունը պետք է ուշադիր լինի՝ այս ծրագրերից դուրս չմնալու համար: Մեր պետական պարտքը կմեծանա, և 2020 թ.-ն ամենածանր վարկային տարին է լինելու սպասարկման իմաստով, մոտ 800 միլիոն դոլար պիտի վճարենք»,- ասել է Հանրային խորհրդի անդամը:
Ըստ Սաֆարյանի՝ սպասվում է լրջագույն համաշխարհային ֆինանսատնտեսական ճգնաժամ, ավելի ծանր, քան 30-ականների ամերիկյան Մեծ դեպրեսիան. «Պետք է աստիճանաբար թուլացնել կոշտ կարանտինը, բացօթյա պայմաններում գործող տնտեսվարողները պետք է աշխատեն: Պետք է բնականոն աշխատանքային ռեժիմի վերադառնանք: Իսպանիան ու Իտալիան հասկացան, որ տանը մնալու քաղաքականությունը ոչ մի լավ բանի չի հանգեցնի»:
Հանրային խորհրդի անդամի կարծիքով՝ կառավարությունը պետք է դիտարկի Գյուղատնտեսության նախարարությունը վերաբացելու հնարավորությունը, քանի որ հատկապես այս փուլում պարենային անվտանգության հարցը կենսական է. «Մեր հողատարածքների 30 տոկոսը չի մշակվում, դա մոտ 150 հազար հա է, այդ ընդարձակ տարածքներում կարելի է ցորենի և գարու արտեր հիմնել: Անցած տարվա մեր ՀՆԱ-ի 31 տոկոսը գյուղատնտեսությունն է, մենք ագրարային երկիր ենք»:
Վազգեն Սաֆարյանի պնդմամբ՝ այսօր ցորենն ավելի կարևոր է, քան ոսկին ու նավթը. «Ցորենի գները չեն ընկնում, այն առաջին անհրաժեշտության մթերք է, մինչդեռ նավթի գինը հասավ զրոյական մակարդակի: Մենք հինգ հազար տարի ցորեն ենք մշակել, այն մեզ համար նոր կուլտուրա չէ»:
Հանրային խորհրդի անդամի պնդմամբ՝ պետք չէ մոռանալ նաև երբեմնի արդյունաբերական հզորությունները վերագործարկելու հնարավորության մասին, դա կարելի է անել, օրինակ, ԵԱՏՄ երկրների հետ տնտեսական կապերը վերականգնելով. «Ռուսաստանի և ԱՊՀ երկրների հետ կարելի է փորձել միասնական արդյունաբերական քաղաքականություն իրականացնել: Միայն անցած տարի 400 հազար տոննա պղնձի խտանյութ ենք արտահանել: Արդյո՞ք վաղվա Եվրոպան, որը մեր պղնձի հիմնական շուկան է, այդ պահանջարկը կունենա, և եթե ոչ, մեր պղինձը որտե՞ղ ենք իրացնելու»:
Սաֆարյանի կարծիքով՝ «Գազպրոմ-Արմենիան» պետք է կրճատի ավելորդ ծախսերը և կառավարման համակարգն առավել ճկուն դարձնի: «Հայաստանում կան շատ ռուսաստանյան տնտեսվարողներ, որոնք գազի սպառող են, օրինակ՝ Հրազդան ՋԷԿ-ի 5-րդ էներգաբլոկը: Ռուսաստանին պետք է ասել, որ մեր տնտեսություններն ինտեգրված են, և կարիք չկա գազի գինը բարձրացնելու: Մեր կառավարությունն ավելի արդյունավետ պետք է խոսի իր ռուս պաշտոնակիցների հետ»,- ամփոփել է Վազգեն Սաֆարյանը:
Դավիթ Սարգսյան