Հասարակության հիասթափության պատճառն ուռճացված փաստարկներն ու խելքից դուրս խոստումներն են. Անի Սամսոնյանը՝ մեծ հիասթափության թեմայով վարչապետի ուղիղ եթերի մասին
ԱԺ «Լուսավոր Հայաստան» խմբակցության պատգամավոր Անի Սամոսնյանի խոսքով, եթե վարչապետի կողմից հնչում է պնդում, որ լրագրողների 70 տոկոսը իշխանությունից փող է ստացել, դա պետք է ապացուցվի, հակառակ դեպքում դրանք մերկապարանոց հայտարարություններ են, որոնք վնասում են լրագրողների հեղինակությանը և աշխատանքին: Tert.am-ի հետ զրույցում ԱԺ պատգամավորն ասաց, որ պոպուլիստական իշխանություններն անհանդուրժող են բազմակարծության նկատմամբ, որը տարածվում է նաև մեդիայի վրա:
-Վարչապետ Նիկոլ Փաշինյանը օրերս հերթական հայտարարությունն է արել՝ ուղղված լրատվամիջոցներին և լրագրողներին, ինչը մեդիադաշտում դժգոհությունների առիթ է հանդիսացել, Նիկոլ Փաշինյանն ասել էր, որ լրատվամիջոցների 90 տոկոսը և լրագրողների 70 տոկոսը իշխանությունից փող է ստացել, և հիմա բոլորը կատաղած են, որ առաջ ստացել են, հիմա չեն ստանում կամ վախվխելով են ստանում: Ինչ տեսակետ ունեք նրա հայտարարության վերաբերյալ:
-Գիտեք, քանի որ պոպուլիստական իշխանություններն անհանդուրժող են բազմակարծության նկատմամբ, այդ տարածվում է նաև մեդիայի վրա։ Իշխանության կողմից լրատվամիջոցների նկատմամբ խտրականության դրսևորումներ բազմիցս են եղել։ Սև ու սպիտակի տրամաբանության մեջ տեղավորվել է նաև մեդիան, ինչի հետևանքով մենք անցած տարի ականատես եղանք լրատվամիջոցների նկատմամբ հարձակումների և անհարգալից վերաբերմունքի։ Ես կարծում եմ՝ անկախ նրանից, թե որքանով է օբյեկտիվ կամ պրոֆեսիոնալ, և ինչ շահեր է հետապնդում լրատվամիջոցը, հասարակական և քաղաքական շրջանակները պետք է զերծ մնան որակումներից կամ պիտակավորումներից։ Այս ճանապարհով հաստատ մենք չենք նպաստում լրատվական դաշտի առողջացմանը կամ բարելավմանը, բայց վնասում ենք լրագրողական աշխատանքին և խոսքի ազատությանը։
Եթե հնչում է պնդում, որ լրագրողների 70 տոկոսը իշխանությունից փող է ստացել, դա պետք է ապացուցվի, հակառակ դեպքում ստացվում, որ դրանք մերկապարանոց հայտարարություններ են, որոնք վնասում են լրագրողների հեղինակությանը և աշխատանքին։ Հատկապես, երբ վարչապետի շուրթերից հնչում է խոսքի արժեքի մասին։ Պետք է ոչ միայն խոսել դրանից, այլև պահպանել այդ արժեքը։
-Վարչապետ Փաշինյանի ընտանիքին պատկանող լրատվամիջոցի նախկին աշխատակիցներն արձագանքում են, որ վարչապետն իր գործելաոճի մասին է խոսել, օրինակ Սաթիկ Սեյրանյանը հիշցնում է մեքենայի, տան, անգամ՝ կահույքի մասին:
-Այս դեպքերին հատուկ չեմ կարող անդրադառնալ, բայց ուզում եմ ընդհանրական եզրահանգում անել։ Առհասարակ, երբ մենք որևէ ոլորտում ցեխ ենք շպրտում նախկին գործընկերների վրա և փառաբանում սեփականը եսը, պետք է հասկանանք, որ որքան երկիրն է փոքր, այնքան այդ ոլորտի շրջանակներն են փոքր։ Գրեթե բոլորը բոլորին գիտեն, բոլորը բոլորի մասին ունեն հիշողություններ։ Բոլորս էլ մեր կյանքի և գործունեության ընթացքում կատարել ենք սխալներ։ Այլ հարց է՝ մենք դրանցից դասեր քաղել ենք, թե՞ ոչ։ Կամ մենք ինչ վերաբերմունք ենք ցույց տալիս նրանց, ովքեր սխալվում են մեր նման, մեր չափ կամ միգուցե մեզանից քիչ։
-«Մեծ հիասթափության մոդելավորումը» վերնագրով ուղիղ եթերի վերաբերյալ գրառում էիք կատարել, այն անվանելով հերթական շանտաժ: Ձեր կարծիքով, որոնք են հասարակության հիասթափության իրական պատճառները:
-Հասարակության հիասթափության ամենամեծ պատճառն ուռճացված փաստարկների և խելքից դուրս խոստումների անհամապատասխանությունն է իրականությանը։ Մարդկանց միշտ ասվել է, որ եթե չլինեն Պողոսը, Պետրոսը, Մարտիրոսը, ապա իրենք շատ լավ են ապրելու։ Հիմա, երկու տարի է ժողովուրդը մերժել է և հեռացրել է Պողոսին, Պետրոսին ու Մարտիրոսին, բայց շարունակում է վատ ապրել ու այժմ էլ արտակարգ դրության հետ կապված՝ էլ ավելի է վատ ապրում։ Այն մարդիկ, ովքեր ժողովրդին համոզում էին, որ Պողոսը, Պետրոսը, Մարտիրոսն են մեղավոր, այսօր ունենալով արդեն երկու տարվա իշխանություն և լծակներ իրենց կառավարման բոլոր ձախորդությունները շարունակում են կապել Պողոսի, Պետրոսի և Մարտիրոսի հետ։ Դե, արի ժողովուրդ, ու մի հիասթափվիր։ Ցավով եմ սա արձանագրում։ Որպեսզի ժողովուրդը չհիասթափվի, անհրաժեշտ է մոդելավորել այդ հիասթափվողներին և բոլորին տեղավորել սևի դաշտում, ենթագիտակցորեն և հոգեբանորեն տրամադրել նրանց չհիասթափվելուն և ոչնչացնել նրանց քննադատական մտածողությունը։