Առաջարկում եմ՝ Կառավարությունը գյուղատնտեսներին անվճար դիզվառելիքով օգնի․ գյուղատնտեսությամբ զբաղվողների 70-80 %-ը վարկերի տակ են. Սասուն Միքայելյան (տեսանյութ)
Գյուղատնտեսությամբ զբաղվողների 70-80 տոկոսը վարկերի տակ են, առաջարկում եմ՝ պետությունն իր վրա վերցնի որոշ պարտականություններ, օրինակ՝ անվճար դիզվառելիքով օգնի։ Այս մասին այսօր ԱԺ հատուկ նիստին ասաց «Իմ քայլը» խմբակցության պատգամավոր Սասուն Միքայելյանը՝ խոսելով պարենային անվտանգության խնդրի մասին։
«Գյուղատնտեսական աշխատանքները 20 օրից վերջանալու են, առաջարկում եմ, եթե հնարավոր է, պետությունն իր վրա վերցնի որոշ պարտականություններ՝ վար ու ցանքը լրիվ արվի, կամ անվճար դիզվառելիքով օգնի։ Գիտեք, մեր ժողովուրդը, ովքեր գյուղատնտեսությամբ են զբաղվում, 70-80 տոկոսը վարկերի տակ են։
Խորհրդային տարիներին կարողացել ենք հանրապետությունում մենք մեզ համար ալյուր ապահովել։ Հիմա պարտադիր չէ հացահատիկային բույսեր ցանվի։ 2-րդ համաշխարհային պատերազմին մարդիկ կարտոֆիլով կարողացան գոյատևել և հաղթել»,- նշեց պատգամավորը։
Սասուն Միքայելյանն ընդգծեց, որ կորոնավիրուսի հետևանքով ճգնաժամային իրավիճակ է ստեղծվել ողջ աշխարհում և հետագայում, պարենային անվտանգության խնդրից խուսափելու համար, Հայաստանը պետք է այս առումով ինքնաբավ լինի ։
«Աստված մի արասցե, սա կարող է երկար ձգվել, հետագայում սրանից պրծնենք, ուրիշ աղետի առաջ կանգնենք։ Ամբողջ աշխարհում է նույն վիճակը, այլ պետություններ չեն կարող մեզ օգնել, բայց մենք մեր գլխի ճարը գոնե տեսնենք ձմեռն անցկացնելու համար»,- ասաց նա։
Արձագանքելով Սասուն Միքայելյանի առաջարկություններին, պարետ, ՀՀ փոխվարչապետ Տիգրան Ավինյանը նշեց, որ պարենային անվտանգությունը Կառավարության առաջնային խնդիրներից մեկն է։
«Ե՛վ տեղական արտադրության, և՛ ներկրվող ապրանքատեսակների վերաբերյալ այլընտրանքային ճանապարհների որոնումը գտնվում է մեր օրակարգում։ Տեղական արտադրության հետ կապված աշխատանքները, որոնց համար արդեն նախատեսված են տարբեր ծրագրեր, այս տնտեսական բլոկի առաջնորդությունը տարվում է ՀՀ վարչապետի կողմից։ Համոզված եմ, որ այդ քննարկումների ժամանակ նույնպես առաջ են քաշվում»,- ասաց պարետը։
Տիգրան Ավինյանը վստահեցրեց, որ կարճաժամկետ հատվածում պարենային ծայրահեղ խնդիրներ չի լինի։
«Միանշանակ, կան որոշակի գնային տատանումներ։ Արտարժույթի տատանումները, լոգիստիկ խնդիրները բերում են որոշակի գների տատանումների։ Այնուամենայնիվ, եթե որոշակի ապրանքատեսակների մասով վերլուծություն ենք անում, ոչ թե այս տարվա, այլ, օրինակ՝ համեմատում ենք 2018թ. հետ, մենք կտեսնենք, որ էական գնային նվազումներ են եղել առաջնային անհրաժեշտության ապրանքների դեպքում»,- նշեց նա։
Մանրամասները՝ տեսանյութում։