Նախարարությունն առանց մեզ տեղյակ պահելու որոշել է դադարեցնել Աչաջրի առողջության կենտրոնի ծննդատան ֆինանսավորումը. հիվանդանոցային մասնաշենքը կլուծարվի, 10 աշխատակից կզրկվի աշխատանքից. տնօրեն
Առողջապահության նախարարությունն առանց մեզ տեղյակ պահելու որոշում է կայացրել դադարեցնել Աչաջուր գյուղի հիվանդանոցի ծննդատան և բուժական բաժնի ֆինանսավորումը: Այս որոշման հետևանքով հիվանդանոցային հատվածը երևի կլուծարվի, 10 աշխատակից կզրկվի աշխատանքից: Այս մասին Tert.am-ի հետ զրույցում ասաց Աչաջրի առողջության կենտրոնի տնօրեն Կորյուն Վարդապետյանը:
«Մենք ոչնչից տեղյակ չենք եղել, ես տեղեկացվել եմ հունվարի 10-ին՝ ժամը 21:00-ի Հանրային հեռուստաընկերության լուրերով, որի ժամանակ Առողջապահության նախարարության ներկայացուցիչներն ասացին, որ Աչաջուր առողջության կենտրոնի ծննդատան բաժանմունքը նույնպես փակվել է: Հետո զանգեցինք ու մինչև այժմ մեզ ոչինչ չեն ասում՝ փակվե՞լ է, թե՞ չի փակվել: Ուղղակի հայտը եկել է, որ ծննդօգնությունը հանված է ֆինանսավորումից: Ստացվում է, որ փակվելու է, բայց առանց մեզ տեղյակ պահելու»,- նշեց նա:
Կորյուն Վարդապետյանն անընդունելի է համարում առանց հիվանդանոցի ղեկավարության քննարկումների, առանց աշխատակիցներին ծանուցելու փակման որոշումը. «Հիմնարկ են փակում առանց այդ հիմնարկ մտնելու, առանց քննարկելու տնօրենի հետ, առանց ծանուցելու աշխատակիցներին, որ երկու ամիս հետո դուք դուրս եք մնալու: Նման բարձիթողի բան լինո՞ւմ է, «բեսպրեդելությո՞ւն» է, թե՞ ինչ է»:
Նրա տեղեկացմամբ՝ Աչաջրի առողջության կենտրոնի հիվանդանոցային և ծննդատան բաժանմունքների տարեկան բյուջեն մինչև 18 մլն դրամ է կազմել՝ կախված ծնունդների թվից:
«Հիմա եթե ծննդօգնությունը հանում են, մենք ունենում ենք ընդամենը 5 մլն դրամ բյուջե, որով չենք կարող ստոմատիկ բաժանմունքը պահել: Միանշանակ, արդեն ավտոմատ ստոմատիկ բաժանմունքն է լուծարվելու: Այսինքն՝ հիվանդանոցային մասնաշենքը երևի կլուծարվի, կմնա ամբուլատոր բաժինը»,- ասաց Կորյուն Վարդապետյանը:
Աչաջրի առողջության կենտրոնի տնօրենի խոսքով՝ Աչաջրի բնակիչների համար այլընտրանքը Իջևանի բժշկական կենտրոնն է, որը 20 կմ հեռավորության վրա է գտնվում համայնքից:
Նա նաև հայտնեց, որ խնդրի վերաբերյալ զրուցել է Տավուշի մարզպետ Հայկ Չոբանյանի հետ: Վերջինս խոստացել է նախարարի հետ զրուցել, երկուշաբթի քննարկել հարցը և տեղյակ պահել որոշումների մասին:
«Պատճառաբանում են, որ բարելավում են ծննդօգնությունը, այսինքն՝ ավելի ապահով են դարձնում մայրական, նորածնային մահացությունների առումով: Ավելի մասնագիտացված, ավելի հագեցված կենտրոններ են տեղափոխում»,- նշեց Կորյուն Վարդապետյանը: 