Պուտինը ոչ ոքի չի պատժում, բայց նաև ոչինչ չի մոռանում. Մոլդովայի նախագահ
ՌԴ նախագահ Վլադիմիր Պուտինին բնորոշ գծերի, համաշխարհային պատմության մեջ նրա դերի, Ռուսաստանին մեծագույն պետության կարգավիճակի վերադարձի և ՌԴ նախագահի՝ առողջության համար օգտակար գինու նկատմամբ հետաքրքրության մասին РИА Новости գործակալությանը տված հարցազրույցում խոսել է Մոլդովայի նախագահ Իգոր Դոդոնը:
- Դուք Պուտինի հետ աշխատել եք մի քանի տարի: Ի՞նչ հարաբերություններ են ձևավորվել ձեր մեջ: Կարելի՞ է դրանք ընկերական անվանել:
- Մեր հանդիպումները միշտ անցնում են շատ բաց և անկեղծ մթնոլորտում: Վլադիմիր Վլադիմիրովիչ Պուտինն օգնել է իրականացնել մի ամբողջ շարք շատ կարևոր ծրագրեր և լուծել հստակ հարցեր ռուս-մոլդովական համագործակցության մեջ: Ինձ համար օրինակ է ծառայում Ռուսաստանի նախագահի դրական տրամադրվածությունն ու իր երկրի ապագայի նկատմամբ հավատը, որի շահերը նա միշտ պաշտպանում է: Մենք տեսնում ենք, որ այդպիսի մոտեցումն արժանանում է Ռուսաստանի քաղաքացիների բացարձակ մեծամասնության աջակցությանն ու Ռուսաստանի սահմաններից շատ հեռու գտնվող երկրների արժանի հարգանքին:
Կարելի՞ է մեր հարաբերությունները համարել ընկերական: Ընկերությունը քաղաքականությունից դուրս է: Վլադիմիր Պուտինը շատ հարցերում ինձ համար պետությանը և ժողովրդին ծառայելու օրինակ է:
- Դուք հանդիպել եք շատ համաշխարհային առաջնորդների հետ: Ինչո՞վ է Ձեզ համար հիշվել Պուտինը, ինչո՞վ է նա ձեզ զարմացրել, որո՞նք են նրա բնորոշ գծերը:
- Հիշվել է նրանով, որ հայրական ձևով լավ ընդունեց: Մեր ամեն մի հանդիպմանը, որքան էլ այն տևի, ես զգում եմ, որ կարող եմ բաց և ուղիղ արտահայտել իմ մտքերը, գնահատական տալ տեղի ունեցող իրադարձություններին: Մենք շատ բաց քննարկում ենք դժվարին հարցեր, և դա մեզ թույլ է տալիս շատ հեշտ հասնել փոխըմբռնման և գտնել լուծումներ այն հարցերին, որոնք կան ռուս-մոլդովական հարաբերությունների օրակարգում:
Ինձ համար զարմանալի է, որ նա նույնիսկ տասնամյակներ անց բոլոր մանրուքներով հիշում է կոնկրետ իրադարձություններ, որոնք տեղ են գտել ռուս-մոլդովական հարաբերությունների պատմության մեջ: Պուտինի բնորոշ գիծը նրա այն խոսքերն են, որ ինքը ոչ ոքի չի պատժում, բայց, միաժամանակ, ընդգծում է, որ ոչինչ չի մոռանում: Նա նաև կարողանում է ապշեցուցիչ հանգստություն պահպանել նույնիսկ շատ բարդ իրավիճակներում, մանավանդ, երբ հարցը վերաբերում է անվտանգությանը:
- Կարո՞ղ եք հիշել որևէ ուրախ պատմություն կամ կատակ, որն արվել է Պուտինի կողմից:
- Մի անգամ Վլադիմիր Վլադիմիրովիչն ինձնից հետաքրքրվեց, հաշվի առնելով այն փաստը, որ Մոլդովան հայտնի է իր գինիով, թե քանի՞ տարի պահպանված գինին է առողջության համար ամենաօգտակարը: Միգուցե 10-15 տարվա, թե՞ ավելի շատ: Ես պատասխանեցի, որ ամենաօգտակարը մինչև մեկ տարի պահպանված գինին է, քանի որ դրա մեջ չկան կոնսերվանտներ և ավելացված նյութեր: Վլադիմիր Պուտինը ժպտաց և ասաց. «փաստորեն ամեն ինչ այդքան պարզ է»: Եվ ընդծեց, որ ինքը դա անպայման կհիշի:
Հարցազրույցի ժամանակ Մոլդովայի նախագահը նշել է նաև, որ Վլադիմիր Պուտինն արդեն գրել է իր անունը համաշխարհային պատմության մեջ: РИА Новости գործակալության հարցազրույցն Իգոր Դոդոնի հետ տեղի է ունեցել Վլադիմիր Պուտինի՝ իշխանության համակարգում գտնվելու 20-ամյակին նվիրված հարցազրույցների շրջանակում: