Զովունի գյուղի չշահագործվող փայտամշակման արտադրամասում բռնկված հրդեհը մարվել է
Նոյեմբերի 18-ին, ժամը 18:21-ին «911» ծառայություն ահազանգ է ստացվել, որ Կոտայքի մարզի Զովունի գյուղում՝ փայտի արտադրամասում, հրդեհ է բռնկվել:
Հրդեհի բարդության «1-ԲԻՍ» կանչով դեպքի վայր են մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատներից չորս մարտական հաշվարկ, ճգնաժամային կառավարման ազգային կենտրոնի արտակարգ իրավիճակների արձագանքման և օպերատիվ խմբերը, ինչպես նաև աղետների բժշկության կենտրոնի հերթապահ խումբը:
Պարզվել է, որ հրդեհը բռնկվել է Զովունի գյուղի 1-ին փողոցի թիվ 128 հասցեում գտնվող չշահագործվող փայտամշակման արտադրամասի տանիքում: Հայտարարվել է հրդեհի բարդության «Թիվ-2» աստիճան:
Դեպքի վայր է մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատներից ևս երկու մարտական հաշվարկ, որոնք անհրաժեշտությունը վերանալու պատճառով վերադարձել են:
Հրդեհը մեկուսացվել է ժամը 19:54-ին, մարվել՝ ժամը 20:21-ին: Այրվել են տանիքի փայտյա կառուցատարրերը՝ մոտ 250 քմ, տանիքում կուտակած թեփ՝ 10 խմ և փայտ՝ 6 խմ: