Մորալեսը հայտարարել է Բոլիվիայում նոր նախագահական ընտրություններ անցկացնելու մասին
Բոլիվիայի գործող նախագահ Էվո Մորալեսը հայտարարել է երկրի ղեկավարի նոր ընտրություններ անցկացնելու մասին: РИА Новости-ի փոխանցմամբ՝ այս հայտարարությունը հետևել է երկրում տեղի ունեցող ցույցերին և Ամերիկյան պետությունների կազմակերպության՝ ձայների վերահաշվարկի մասին զեկույցի հրապարակմանը:
«Ես որոշում եմ կայացրել, առաջին հերթին, ամբողջությամբ թարմացնել Գերագույն ընտրական դատարանի կազմը, երեքշաբթի նշանակել նոր համընդհանուր ընտրութուններ, որոնց միջոցով ժողովուրդը կկարողանա ժողովրդավարական եղանակով ընտրել նոր քաղաքական գործիչների»,- հայտարարել է Մորալեսը` տեղի հեռուստաալիքով հեռարձակվող ասուլիսի ժամանակ:
Նա նաև դիմել է ժողովրդին՝ խնդրելով «նվազեցնել լարվածությունը» և «վերջ դնել բռնությանը՝ հանուն բոլորի»:
Բողոքի ցույցերը հարավամերիկյան երկրում սկսվել էին հոկտեմբերի 20-ին և շարունակվում են մինչ օրս: Այս ընթացքում 380 մարդ է տուժել: Անկարգությունների և ցույցերի համար պատճառ են դարձել ընտրությունների ձայների հաշվարկի արդյունքները:
Ամերիկյան պետությունների կազմակերպությունը, որը դիտորդ է հանդիսանում, ստուգումների արդյունքում մի շարք խախտումներ է հայտնաբերել: