Ոչխար պահելու` վարչապետի խորհուրդն այդպես էլ լայն արձագանք չի գտնում ազգաբնակչության մոտ. Հայաստանում ոչխարի գլխաքանակը տարեցտարի պակասում է
Գեղարքունիքի մարզից Արամ Ենգոյանը և իր ընկերները, վարչապետի կոչից և ծրագրից ոգևորված, այս տարի որոշել էին ոչխարաբուծությամբ զբաղվել: Ծրագիր էին գրել, ներկայացրել Կառավարությանը և նույնիսկ որպես զեկուցող հանդես եկել «Իմ քայլը հանուն Գեղարքունիքի մարզի» համաժողովին: Այսօր, սակայն, ոչխար պահելու մտադրությունից հրաժարվել են, նրանց մի մասը մեկնել է Ռուսաստանի Դաշնություն, իսկ Արամ Ենգոյանը որոշել է այլ ոլորտում ուժերը փորձել:
«Ծրագիրը ներկայացրեցի, հետո փոշմանեցի, ՓՄՁ աջակցության ծրագրին եմ դիմել և լրիվ այլ գործով եմ զբաղվում: Մենք մի քանի հոգով պետք է ներդրում կատարեինք, ակնկալվող աջակցությունը մի քիչ ժամանակի առումով ուշացավ, մասնակիցները հրաժարվեցին, գնացին Ռուսաստան, ես էլ դե չեմ կարող ծրագրում նշված գումարային ամբողջ ներդրումը կատարել,»- Tert.am-ի հետ զրույցում ասաց նա և նշեց, որ նույնիսկ մոռացել է, թե ինչքան գումար էր անհրաժեշտ, որ գործը սկսեին:
Արամ Ենգոյանը չի կարող ասել, թե ինչու ոլորտը զարգացում չի ունենում: «Ոչ մի բան չի խանգարում, անասնապահությունը, կարծում եմ, եկամտաբեր ճյուղ է, ուղղակի, եթե ես կարում եմ իմ մասնագիտությանը համապատսխան ճյուղում ներդրում անել, ինչու ժամանակ կորցնեմ ոչխարաբուծության վրա՝ ինչ-որ բան սովորելու համար»,- ասաց նա:
Հիշեցնենք, որ դեռևս 2018 թվականին Նիկոլ Փաշինյանը շարունակում էր նույն կոչն ուղղել քաղաքացիներին, որ փոխեն մտածողությունը և աղքատությունը հաղթահարեն նաև ոչխար պահելով։ «Այո, ոչխար պահեք, քանի որ ոչխարի արտահանման համար կան անսահմանափակ հնարավորություններ»,- ասել էր Նիկոլ Փաշինյանը:
Համաձայն Վիճակագրական կոմիտեի հրապարակված տվյալների՝ վերջին տարիներին ոչխարի և այծերի գլխաքանակը նվազել է՝ 2019 թվականի հունվարի 1-ի դրությամբ կազմել է 638.2 հազար գլուխ՝ 2015 թվականի նույն ժամանակահատվածին գրանցված 745.8 հազար գլխի դիմաց: 2017 թվականին ոչխարի գլխաքանակը կազմել է 727 հազար 100 գլուխ, 2018-ին՝ 660 հազար 100:
Վարչապետի կոչից հետո Հայաստանի էկոնոմիկայի նախարարությունը կառավարությանն էր ներկայացրել 2019-2023թթ. Հայաստանում ոչխարաբուծության և այծաբուծության զարգացմանն աջակցության պետական ծրագիր: Ըստ ծրագրի ՝ 2019-2023 թվականներին պետական աջակցությամբ ոչխարաբուծությամբ և այծաբուծությամբ զբաղվող տնտեսավարողներին հնարավորություն կընձեռվի մատչելի պայմաններով ձեռք բերել (ներկրել) շուրջ 30 հազար գլուխ տարբեր սեռահասակային խմբերի մանր եղջերավոր կենդանիներ (հղի ոչխարներ և այծեր, էգ և արու մատղաշ), կավելանա ոչխարների և այծերի գլխաքանակը։ Ծրագրի շրջանակներում ձեռք բերված բարձր տոհմային կենդանիների հաշվով մինչև 2027 թվականը կապահովվի շուրջ 100 հազ. գլուխ արտադրատնտեսական բարձր հատկանիշներով օժտված սերնդի ստացում, կավելանան ոչխարաբուծական և այծաբուծական արտադրանքի ծավալները։