Օրվա իշխանությունը փորձ է անում ամբողջական ուզուրպացիա իրականացնել. Երվանդ Վարոսյանը՝ ՍԴ-ի դեմ իշխանության պայքարի մասին
Վաղուց արդեն ակնհայտ է, որ բոլոր նրանք, ովքեր իշխանության կամակատար դառնալու պատրաստակամություն չունեն, ենթարկվելու են ճնշումների: Դա պարզ է: Այն որ Սահմանադրական դատարանի շուրջ պրոցեսներ ընթանում են և դեռ ընթանալու են, դա էլ է փաստ: Այս մասին Tert.am-ի հետ զրույցում ասաց փաստաբան Երվանդ Վարոսյանը:
Հարցին՝ արդյո՞ք ԱԱԾ տնօրենի և ոստիկանապետի պաշտոնանկությունները ՍԴ-ի շուրջ ընթացող պրոցեսները լռեցնելու համար են արվում, Վարոսյանն ասաց՝ հաշվի առնելով այն հանգամանքը, որ պաշտոնանկությունների վերաբերյալ պաշտոնական բացատրություն չկա, յուրաքանչյուր մարդ ինչ ուզի, կարող է մտածել: Նա չի կարծում, որ այս պաշտոնանկություններով փորձում են շեղել Սահմանադրական դատարանի վերաբերյալ արված հայտարարություններից:
«Մենք միայն մեկ պաշտոնանկության հետ կապված ինչ-որ պարզաբանում ունենք՝ Արթուր Վանեցյանից: Ինչ-որ մեկը հասարակությանը ներկայացրե՞լ է պատճառները: Ես այս ամեն ինչը կապում եմ հետևյալի հետ. ակնհայտ է ինձ համար, որ օրվա իշխանությունը փորձ է անում ամբողջական իշխանության ուզուրպացիա իրականացնել: Այսինքն՝ ամբողջապես իշխանության 3 թևերը վերցնել կատարյալ վերահսկողության ներքո»,-ասաց Երվանդ Վարոսյանը:
Նրա խոսքով, եթե ՍԴ նախագահ Հրայր Թովմասյանը հրաժարական տվող անձնավորություն լիներ, վաղուց արդեն տված կլիներ: Վարոսյանը հավելեց՝ թե ինչ կանեն իշխանությունները, ինչի նրանք պատրաստ կլինեն հանուն ամբողջական իշխանության, դա ցույց կտա ժամանակը. իրավիճակն այնպես է զարգանում ու քայլերն այնպիսին են, որ տրամաբականական կանխատեսումներ անելն ահնար է:
«Ամեն ինչ կարող է տեղի ունենալ, բայց մի բան չպիտի մոռանանք՝ երբեք ոչ մի իշխանություն որևէ տեղ չի հաջողել այն դեպքում, երբ ինքը ուզուրպացրել է իշխանությունն ամբողջ ծավալով»,- ասաց Վարոսյանը:
Ինչ վերաբերում է ՍԴ նախագահի լիազորություններն օրենքով սահմանված կարգով դադարեցնելու վերաբերյալ իշխանության հայտարարություններին, Վարոսյանն ասաց, որ ոչ ոք հենց այնպես ոչինչ չի կարող դա ձեռնարկել: Ըստ նրա՝ օրենքով ու սահմանադրությամբ հստակ սահմանված են այն չափորոշիչներն ու մեխանիզմները, որոնց առկայության պարագայում այս կամ այն գործընթացը կարող է սկսվել:
«Ոչ ոքի իրավունք տրված չէ կամայականորեն՝ իր ցանկությամբ ինչ-որ բաներ անելու: Իսկ որ սա քաղաքական գործընթաց է, ես կասկած չունեմ: Համոզված եմ, որ եթե Հրայր Թովմասյանը որոշեր դառնալ «Իմ քայլ»-ի «սրտի» ՍԴ նախագահը, այսօր ոչ Մակունցը հայտարարություն կաներ, ոչ էլ Ուլիխանյանը»,-ասաց նա:
«Շատ պաշտոնյաներ կան հին Հայաստանից մնացած, որոնք հարմարվել են նոր իշխանություններին և ոչ մեկ նրանց չի հիշում, բոլորը երջանիկ ապրում են: Դրա համար այս ամեն ինչը քաղաքական պրոցես է»,-եզրափակեց Վարոսյանը: