Չինարին չի գնդակոծվի միայն այն դեպքում, եթե Օդունդաղ սարի բոլոր դիրքերը վերցրած լինենք. պահեստազորի գնդապետ
Պաշտպանության նախարարությունը պետք է 140 հեկտար հողատարածքի ձեռքբերման վերաբերյալ հստակ տեղեկատվություն տրամադրի, հայտնի՝ արդյոք այն այլևս մեր կրակի ներքո է, այնտեղ մարդիկ կարող են գյուղատնտեսական աշխատանքներ կատարել:
Այս մասին Tert.am-ի հետ զրույցում ասաց ռազմական փորձագետ, պահեստազորի գնդապետ Հայկ Նահապետյանը՝ պարզաբանելով, որ այս հարցի պատասխանից միայն կարող է պարզ լինել՝ Չինարիում գնդակոծություն կարող է լինել, թե ոչ:
«Հարցի պատասխանից պարզ կլինի, թե մենք ինչ բարձունքներ ենք վերցրել, եթե 140 հեկտարը մշակովի հող է դառնալու, ու դու գնում ես, գործ ես անում, դա արդեն կարող է նշանակել, որ հարակից այգիների, դաշտավայրի վրա հակառակորդն այլևս չի կրակելու, և դա նշանակում է՝ դու ամբողջ շրջակա բարձրունքները վերցրել ես, և խոսքն այդ պարագայում չի կարող միայն 140 հեկտարին վերաբերել»,- նշեց նա:
Հայկ Նահապետյանի խոսքով ՝ ծառայությունից տարբեր պատրվակով նախկինում խուսափած պաշտոնյաները Չինարիի վերաբերյալ մտքեր են բարբաջում, բայց դա իրենց գործը չէ, ռազմական գերատեսչությունը պետք է հստակ պատկերը ներկայացնի:
«Հակառակորդն այդ տարածում ունի գերիշխող դիրք բոլոր ուղղություններով, Օդունդաղ սարը փռված սար է, երկու մարզի վրա իշխում է, մեր դիրքերը դրա տակ են, ես այդ բանակային կորպուսում եմ ծառայել, լավ գիտեմ, հիմա եթե ասում են՝ այլևս Չինարին չի գնդակոծվելու, դա միայն կարող է լինել այն պարագայում, եթե շատ ավելի ձեռքբերում ենք ունեցել, քան գրվում է: Չինարին, Կոթին հակառակորդի ափի մեջ էր. կային վայրեր, որոնք մշտապես գնդակոծվում էին՝ մանկապարտեզ, դպրոց, խանութ, հիմա գյուղացիներին հարցրեք, տեսեք` ինչ են անում»,- նշեց նա:
Հայկ Նահապետյանն ասաց, որ այդ ուղղությամբ հակառակորդի բոլոր դիրքերը վերցնելու պարագայում միայն հնարավոր կլինի պնդել, թե Չինարին այլևս չի գնդակոծվի:
Հիշեցնենք, որ պատմաբան, ռազմական փորձագետ Արթուր Եղիազարյանն իր ֆեյսբուքյանյան էջում գրառում էր արել` նշելով, որ ՀՀ զինված ուժերի ստորաբաժանումները կարողացել են ավելի քան 140 հեկտար տարածք ազատագրել, և որ միայն ՀՀ ԶՈւ արդյունավետ գործողության արդյունքում է հաջողվել կասեցնել հակառակորդի սադրանքը։ Պաշտպանության նախարարի մամուլի խոսնակ Արծրուն Հովհաննիսյանը հաստատել է տեղեկությունն այն մասին, որ հայկական զինուժը բարելավել է իր դիրքերը Տավուշի մարզում` Ադրբեջանի հետ սահմանագծում:
Նա ձեռնպահ էր մնացել հստակ թիվ ներկայացնելուց՝ պարզաբանելով, որ ճշգրիտ գործողությունների արդյունքում այժմ մեր զորքերի վերահսկողության տակ են գտնվում մեր երկրի համար կարևոր ստրատեգիական նշանակություն ունեցող՝ Վրաստանից Հայաստան մտնող գազատար խողովակաշարը և Հայաստան-Վրաստան ավտոմայրուղին, ինչպես նաև ադրբեջանական մի քանի գյուղական բնակավայրեր տանող ճանապարհները։
Ավելի ուշ ԱԺ նախագահ Արարատ Միրզոյանն էլ գրառել էր, որ Չինարին այլևս չի կարող գնդակոծվել, և Հայաստան մտնող գազամուղի անվտանգությունը ևս ապահովված է, գրառումը քննադատությունների էր արժանացել ռազմական փորձագետների շրջանակներում: