«Առավոտ». ՀՀ–ն եւ ԱՄՆ-ը դեռ հեռու են ռազմավարական համագործակցության հնարավորությունից. Սոս Ավետիսյան
ԱԺ արտաքին հարաբերությունների հանձնաժողովի անդամ, «Իմ քայլը» խմբակցության պատգամավոր Սոս Ավետիսյանը Հայաստանի համար շատ կարեւոր է համարում ԱՄՆ-ի հետ ռազմավարական գործընկերության ծրագիր ունենալը, մանավանդ, որ ԱՄՆ-ը նման ծրագրեր ունի մեր երկու հարեւանների ՝ Վրաստանի եւ Ադրբեջանի հետ։ Հիշեցնենք, նման նախաձեռնությամբ հանդես է եկել ԱՄՆ-ի Կոնգրեսի Հայաստանի հետ բարեկամության խմբի համանախագահ կոնգրեսական Ֆրանք Փալլոնը։
«Առավոտի» հետ զրույցում իշխող ուժը ներկայացնող խորհրդարանական խմբակցության պատգամավորը հիշեցնում է, որ վերջերս ԱԱՆ-ից բավականին բարձրաստիճան պատվիրակություն էր գտնվում Հայաստանում եւ քննարկումների ժամանակ խոսք էր գնում ԱՄՆ-ՀՀ ռազմավարական երկխոսության մասին. «Ես կարծում եմ՝ նախ երկխոսություն պետք տեղի ունենա, հետո նոր Ռազմավարական գործընկերության հարցերը բարձրացվեն։ Ռազմավարական երկխոսության արղյունքը հետագայում պետք է դառնա Ռազմավարական գործընկերության հիմք»։ Սոս Ավետիսյանն իրապես կարեւոր է համարում, որ ԱՄՆ-ում գնահատվի ժողովրդավարության նկատմամբ Հայաստանի ձգտումը եւ հասկանան, որ դա մեզ համար արժեքավոր եւ ամենակարեւոր հարցն է ու այն դուրս է աշխարհաքաղական հաշվարկներից։
Ֆրանք Փալլոնը դեմոկրատ կոնգրեսական է, իսկ այդ թեւը Կոնգրեսում որոշումների ընդունման հարցում քիչ ազդեցություն անի։ Այս համատեքստում, մեր զրուցակիցը կարեւորում է այն, որ կարողանանք ԱՄՆ-ՀՀ համագործակցության այդ ձեւաչափն ընկալելի դարձնել նաեւ կոնգրեսական հանրապետականների համար, որպեսզի գործընթացներն իրական զարգացման հարթություն տեղափոխելու հնարավորություն լինի։ Մեր զրուցակիցը նաեւ նկատում է, որ ավանդաբար ընդունված է եղել, որ էթնիկ փոքրամասնության լոբբիստները դեմոկրատների հետ են ավելի սերտ համագործակցել։ Բայց, քանի որ ԱՄՆ-ում էլ է իրավիճակ փոխվել, նա հույս անի, որ այս մասով էլ համագործակցությունների նոր հնարավորություններ կբացվեն։
Հայ-ամերիկյան ռազմավարական հարաբերությունների համար մեր զրուցակիցը հայ-ռուսական ռազմավարական դաշնակցությունը եւ ՀՀ-ում ռուսական ռազմաբազայի գոյությունը, խոչընդոտ չի համարում։ Հայ-ամերիկյան ռազմավարական երկխոսության հիմքում, ըստ նրա կարող են լինել տնտեսական կապերը։ Այս համատեքստում, նա վստահ է, որ Հայաստանի բոլոր միջազգային գործընկերները շատ լավ հասկանում են մեր երկրի այս կամ այն պարտավորվածությունները եւ որեւէ հարաբերության պետք չէ դիտարկել աշխարհաքաղաքական վայրիվերումների տրամաբանության մեջ. «Այլ զուտ այն տրամաբանության մեջ, որ կա երկիր, որտեղ ժողովրդավարությունն ու մարդու իրավունքները անկյունաքարային են եւ այդ արժեքների համար այդ երկիրը պետք է ունենա ինստիտուցիոնալ լուրջ աջակցություն։ Իսկ ռուս գործընկերների հետ մեր հարաբերությունները բարձր մակարդակի վրա են եւ ոչ մի դեպքում մեկ այլ երկրի հետ հարաբերություններն ի հաշիվ հայ-ռուսական հարաբերությունների չպետք է լինեն։ Ավելին, դրանք պետք է փոխլրացնող լինեն։ Փոքր պետության տեսանկյունից, մենք չպետք է ընկնենք այս կամ այն աշխարհաքաղաքական խաղարկումների մեջ, այլ մեր ազգային շահը պետք է պահպանենք այնպես, որ ունենանք այդ հավասարակշռումը»։
Նյութն ամբողջությամբ կարդացեք թերթի այսօրվա համարում։