Պուտինը ժամանել է Նուր Սուլթան՝ ԵԱՏՄ գագաթնաժողովին մասնակցելու
Ռուսաստանի նախագահ Վլադիմիր Պուտինը ժամանել է Նուր Սուլթան, որտեղ չորեքշաբթի կմասնակցի Եվրասիական տնտեսական Բարձրագույն խորհրդի նիստին:
Ինչպես հաղորդում է ТАСС գործակալությունը՝ վկայակոչելով Կրեմլի հաղորդագրությունը, վաղվա նիստը նվիրված կլինի Եվրասիական տնտեսական միության ստեղծման հնգամյակին: «Բարձրագույն խորհրդի անդամները կամփոփեն հինգ տարվա ընթացքում կատարված աշխատանքի արդյունքները և կուրվագծեն ամենատարբեր ոլորտներում (առևտուր, տնտեսություն, արդյունաբերություն, ֆինանսներ, սոցիալական քաղաքականություն) փոխգործակցության ընդլայնման հարցով առաջադրանքները», - ասվում է հաղորդագրության մեջ:
Ստորագրման է պատրաստվել միության անդամ երկրների ղեկավարների համատեղ հայտարարության փաթեթը: Կհաստատվեն նաև երկրների 2019-2020 թվականների մակրոտնտեսական ռազմավարության ուղենիշները: Բացի այդ, նախատեսվում է դիտարկել ԵԱՏՄ միջազգային գործունեությանն առնչվող հարցերը:
Կայանալիք հանդիպմանը կմասնակցեն Հայաստանի, Բելառուսի, Ղազախստանի, Ղրղզստանի և Ռուսաստանի ղեկավարները, ինչպես նաև հանդիպմանը հրավիրված են Մոլդովայի նախագահ Իգոր Դոդոնը՝ որպես դիտորդ երկրի ղեկավար և Տաջիկստանի նախագահ Էմոմալի Ռահմոնը՝ որպես պատվավոր հյուր: