Եթե ցանկանում ենք Հայաստանն ապագայում դասվի աշխարհի առաջատար երկրների շարքում, ապա պետք է սկսել այսօրվանից՝ երեխաներին տալով լավ կրթություն. Արմեն Սարգսյան (տեսանյութ)
Նախագահ Արմեն Սարգսյանը կարծում է՝ աշխարհի զարգացման միտումները հասկանալու և դրանցից հետ չմնալու լավագույն միջոցը արտասահմանի լավագույն գիտնականներին պարբերաբար Հայաստան հրավիրելն ու նրանց փորձին ծանոթանալը է: «Էվոլյուցիա և արհեստական բանականություն» խորագրով միջազգային գիտաժողովն այս միտքն իրագործելու հերթական հարթակներից մեկն է:
«Deworkacy Yerevan» համաշխատանքային կենտրոնում մարտի 29-ից ապրիլի 3-ը կընթանա «Էվոլյուցիա և արհեստական բանականություն» խորագրով միջազգային գիտաժողովը, որի ընթացքում Հայաստան հրավիրված աշխարհի առաջատար գիտնականներն և փորձագետները կքննարկեն էվոլյուցիայի, այդ թվում՝ արհեստական բանականության զարգացման համաշխարհային միտումներն ու օրակարգը:
«Այս փոքր կոնֆերանսում ներկա են աշխարհի լավագույն մասնագետները, որոնք զբաղվում են մաթեմատիկական մոդելավորմամբ, այսինքն՝ արհեստական բանականությամբ և էվոլյուցիայով: Սրանց կապը շատ էական է: Խոսքը մարդկության էվոլյուցիայի մասին է, հետևաբար այստեղ կան աշխարհահռչակ մասնագետներ, որոնք կարող են խոսել՝ ինչպես են տեսնում աշխարհը, մարդկությանը սրանից 50, 100 տարի հետ: Եվ նաև մաթեմատիկոսներ, որոնք պատրաստում են այդ տեխնոլոգիաները: Հայաստանը պետք է մասնակից լինի սրան: Եթե մենք ցանկանում ենք զբաղվել պարզ վերարտադրությամբ, ապա միշտ կլինենք գնացքից հետ»:
Միջազգային գիտաժողովին մասնակցելու համար Հայաստան են ժամանել առաջատար փորձագետներ և գիտնականներ ԱՄՆ-ից, Չինաստանից, Ճապոնիայից, Ֆրանսիայից, Իսպանիայից, Իտալիայից, Գերմանիայից, Շվեյցարիայից, Նիդերլանդներից, Հունգարիայից, Ռուսաստանից, Իրանից, Իսրայելից և Սինգապուրից՝ քննարկելու էվոլյուցիայի զարգացման միտումներն ու մշակելու ապագա տեսլականը: Գիտաժողովի շրջանակում կդասախոսեն Շվեյցարիայի ֆինանսական ռիսկերի թիվ մեկ փորձագետ Դիդիե Սոռնեն: Գիտաժողովին ելույթ կունենա նաև ֆրանսիացի ֆիզիկոս Սերժ Գալամը, որը կանխատեսել է «Brexit»-ի քվեարկության արդյունքն ու Թրամփի հաղթանակը:
«Ցանկացած նմանատիպ գիտաժողով հնարավորություն է տալիս ծանոթանալու լավագույն գիտնականների հետ, սակայն ես այստեղ ավելի շատ կարևորում եմ այն գաղափարը, որ սարքենք Հայաստանը ամենախելոք մարդկանց, ամենահետաքրքիր բիզնեսմենների հավաքատեղի: Մենք փորձում ենք այդ գործընթացներին աջակցել»,-Tert.am-ի հետ զրույցում ասաց ԻՏՁՄ գործադիր տնօրեն Կարեն Վարդանյանը:
Արմեն Սարգսյանն ընդգծում է՝ եթե ցանկանում ենք Հայաստանն ապագայում դասվի աշխարհի առաջատար երկրների շարքում, ապա պետք է սկսել հենց այսօրվանից՝ երեխաներին տալով լավ կրթություն. «Իրականությունը գնահատելով՝ ես տեսնում եմ հսկայական պոտենցիալ և այն կարող է իրականություն դառնալ, եթե հստակ քայլերով առաջ գնանք: Եվ այդ քայլերից մեկն էլ այս կոնֆերանսներն են, այսինքն՝ Հայաստանը ներկայացնել աշխարհի լավագույն գիտնականներին և ընդհակառակը՝ Հայաստանին ներկայացնենք նրանց»:
Նշենք, որ Երևանում «Էվոլյուցիա և արհեստական բանականություն» և միջազգային Տնտեսական գիտաժողովներն իրականացվում են Արտեմ Ալիխանյանի անվան ազգային-գիտական լաբորատորիայի կողմից՝ ՀՀ Կառավարության, ԱՏՁՄ-ի և «Աջակցություն ՓՄՁ զարգացմանը Հայաստանում» ծրագրի աջակցությամբ: