Կառավարությունը գրավատներին առաջարկել է 6 մլն դրամը 3 փուլով վճարել, ինչին նրանք չեն համաձայնել. սպասվում է ևս մեկ հանդիպում
Կառավարությունը գրավատների ներկայացուցիչներին առաջարկել է 60 անգամ բարձրացվելիք տուրքը վճարել տարաժամկետում կտրվածքով, ինչին նրանք չեն համաձայնվել: Այս մասին Tert.am-ի հետ զրույցում ասաց Հայաստանի ֆինանսավարկային կազմակերպությունների խորհրդատվական կենտրոնի նախագահ Հրանտ Նալբանդյանը, ով մասնակցել է կառավարության հետ մարտի 22-ին տեղի ունեցած հանդիպմանը:
«Առաջարկել են այդ 6 մլն դրամը, որը պետք է վճարվի 1 տարվա համար, դա ուղղակի տարաժամկետել այս պահին: Այսինքն, այդ 6 մլն դրամը 3 փուլով վճարվի՝ 3 տարվա ընթացքում, բայց 3 տարի հետո նորից 6 մլն դրամ վճարենք տարեկան»,- հայտնեց Հրանտ Նալբանդյանը:
Հիշեցնենք, որ բողոքի ակցիաներ իրականացնող գրավատների ներկայացուցիչները Կառավարության հետ հանդիպում-քննարկում էին անցկացրել մարտի 22-ին: Կառավարությունից հանդիպմանը ներկա են եղել փոխվարչապետ Մհեր Գրիգորյանը, ինչպես նաև Կառավարության և Կենտրոնական բանկի այլ ներկայացուցիչներ:
Կողմերն այս հանդիպմանը համաձայնության չեն եկել: Հրանտ Նալբանդյանի խոսքով՝ նախատեսվում է ևս մեկ հանդիպում այսօր կամ վաղը. «Ճիշտն ասած, պարզաբանում չտրվեց մեզ, թե հիմքում ինչ է ընկած միանգամից 60 անգամ տուրքի բարձրացման, ինչ ձևով է հաշվարկված դա»:
«Պետական տուրքի մասին» օրենքում սպասվող փոփոխություններով՝ 60 անգամ ավելացվելու է գրավատների և փոխանակման կետերի պետական տուրքը: Գրավատների համար ներկայիս 100 000 դրամի փոխարեն սահմանվելու է 6 000 000 (վեց միլիոն), փոխանակման կետերի համար՝ 50 000-ի փոխարեն 3 000 000 (երեք միլիոն) դրամ պետական տուրք:
«Մեր պահանջն այն, որ նախատեսված բարձրացումները լինեն բոլորի համար հավասարապես: Եթե ինչ-որ չափանիշով դիտարկվում է մի ոլորտի թանկացումը, նույն չափանիշը կիրառվի նաև մյուսների համար: Մեր ասածն այն է, որ բարձրացումները համահունչ լինեն, ոչ թե փոքրերին այս ոլորտից ընդհանրապես բնաջնջելու համար»,- ասաց ֆինանսավարկային կազմակերպությունների խորհրդատվական կենտրոնի նախագահը:
Նշենք, որ օրենքի փոփոխությամբ գրավատների համար պետական տուրքի բարձրացում 60 անգամ է նախատեսվում, իսկ բանկերի համար ավելի քան 2 անգամ՝ 3 միլիոնից 7 միլիոն դրամ:
Կառավարության փոփոխություններից մյուսի՝ շաքար պարունակող ըմպելիքների 1 լիտրի համար 30 դրամ ակցիզային հարկ սահմանելու դեմ բողոքող «Հայ կոլա» ընկերության տնօրեն Տիգրան Հովսեփյանը ևս մարտի 19-ին Կառավարության շենքում հանդիպել էր փոխվարչապետ Մհեր Գրիգորյանին:
Հանդիպումից անմիջապես հետո Tert.am-ի հետ զրույցում Տիգրան Հովսեփյանն ասել էր, որ Մհեր Գրիգորյանը խոստացել է մոտակա ժամանակահատվածում զանգահարել, նորից հրավիրել քննարկման և հայտնել, թե վերջնական ինչ տարբերակ է առաջարկում գործադիրը:
«Դեռ պատասխան չի եղել: Նստած տախտին, սպասում ենք բախտին: Սպասում ենք, որ այսօր կամ վաղը պատասխան լինի մեզ, տեսնենք, մեր ճակատագիրն ինչ է լինելու, որ մենք էլ իմանանք իրենց ճակատագիրն ինչ է լինելու»,- հայտնեց «Հայ կոլա» ընկերության տնօրենը: