Չեմ հավատում, որ Հայաստանի որևէ առաջին դեմք՝ լինի վարչապետ, թե նախագահ, հողեր կհանձնի. Վիգեն Հովսեփյան
Եթե ԱՄՆ բոլոր նահանգներն էլ ճանաչեն Հայոց ցեղասպանությունը, դա չի նշանակի, որ ԱՄՆ իշխանությունները կճանաչեն 1915թ.-ի եղելությունը: Այս մասին Tert.am-ի հետ զրույցում ասաց ՀՅԴ Արևմտյան Ամերիկայի ԿԿ ներկայացուցիչ Վիգեն Հովսեփյանը՝ խոսելով այն մասին, որ ԱՄՆ 50 նահանգներից 49-ը ճանաչել են Հայոց ցեղասպանությունը:
«Նահանգների ճանաչումը հետևանք չի ունենա դաշնակցային մակարդակի ճանաչման վրա: Սա զուտ բարոյական արժեք ունի, որ ասենք, որ բոլոր նահանգները ճանաչված են: Կան նահանգներ, որտեղ հայությունը մեծ ներկայություն չունի, դրա համար աշխատանքներն ավելի դանդաղ են ընթանում և այդ նահանգները ուշ են ճանաչում ցեղասպանությունը, կամ, ինչպես Միսիսսիփին, դեռ չի ճանաչել»,- ասաց Հովսեփյանը:
Ըստ ՀՅԴ ներկայացուցչի՝ Թուրքիայի վրա անուղղակի ազդեցություն է ունենում ցանկացած նահանգի կամ պետության կողմից Հայոց ցեղասպանության ճանաչումը:
«Նույնիսկ եթե Հայոց ցեղասպանության ոճիրն իր ամբողջ բարոյական արժեքով գլխավոր պատճառը չէ, որ Եվրոպան մերժի Թուրքիայի անդամակցությունը Եվրամիությանը, բայց այն, որ դա գործիք է ԵՄ ձեռքին, որ Անկարան կատարի որոշումները, փաստ է: Կարծում եմ, որ սա ճնշում է Թուրքիայի վրա: Բացի այդ, Հայոց ցեղասպանության ճանաչման ճիգերը պետք է միշտ օրակարգում լինեն: Սրանք աստիճաններ են՝ հետագայում պահանջներ դնելու և հատուցման օրակարգը առաջ տանելու համար»,- նշեց Վիգեն Հովսեփյանը:
Վերջինս նշեց, որ համաձայն է այն տեսակետների հետ, որ Հայաստանի նոր իշխանությունների համար արտաքին քաղաքական օրակարգում «Հայոց ցեղասպանության ճանաչման ուղղությամբ քաղաքականություն վարելու հերթը չի հասել», որովհետև կան այլ խնդիրներ, կան մարտահրավերներ:
«Լեռնային Ղարաբաղի հակամարտության շուրջ բանակցությունների խնդիր կա, կան տնտեսական խնդիրներ և այլն: Այս բոլոր խնդիրներից հետո կարծում եմ հերթը կգա ցեղասպանության ճանաչման շուրջ տարվելիք աշխատանքին: Չեմ կարող պատկերացնել, որ կարող է լինել որևէ իշխանություն, որ այս օրակարգը մոռանա: Պարզապես հերթը չի հասել: Բայց ասեմ, որ դեսպանների մակարդակով աշխատանք տարվում է»,- նշեց Հովսեփյանը:
Ինչ վերաբերում է Լեռնային Ղարաբաղի հակամարտության կարգավորմանը, Վիգեն Հովսեփյանն ասաց, թե չի կարող կանխատեսել՝ արդյոք ՀՀ դիրքորոշումը՝ Արցախը վերադարձնել բանակցային սեղան, կմոտեցնի՞ հարցի կարգավորմանը, թե ոչ:
ՀՅԴ-ականն ասաց, որ այն, որ պետք է Արցախը մասնակցի բանակցություններին, միանշանակ է:
«Ճիշտ է, որ վարչապետը հարցը բարձրացրել է: Սա լավ է: Ադրբեջանական կողմը Փաշինյանի դիրքորոշումը ընկալում է որպես հարցը ձգձգելու մարտավարություն, բայց սա հարց է, որը օրակարգում է, հարցի մասին պետք է խոսել, այն պետք է բարձրաձայնել»,- նշեց Վ. Հովսեփյանը:
Նրա խոսքով՝ Մինսկի խմբի դիրքորոշումն էլ կանխատեսելի չէ: «Եթե ՄԽ-ն ուզում է, որ բովանդակալից քննարկումներ լինեն, ուրեմն կընդունի ՀՀ դիրքորոշումը: Ինչպես անգլերեն ասում են՝ «փիղը սենյակի մեջտեղում է», հնարավոր չէ անտեսել դա, պետք է քննարկել»,- հավելեց նա:
Հովսեփյանն ասաց, թե չի հավատում, որ ՀՀ որևէ իշխանություն «հողեր հանձնելու» քաղաքականություն կտանի: «Սա ներքաղաքական հարց չէ, ես չեմ հավատա, որ Հայաստանի որևէ առաջին դեմք՝ լինի վարչապետ, թե նախագահ, հողեր կհանձնի: Եթե նման բան արվի, դա վերջն է, դա այդ իշխանության վերջն է, քաղաքական թիմի վերջն է, այդ մարդը կստանա դավաճանի կարգավիճակ: Եվ ո՞վ կգնա նման քայլի: Ես չեմ հավատում այն կարծիքներին, որ մութ գործարքներ կան»: