«Քաղաքացու օր» ունենալը պարզապես առիթ է հիշելու քաղաքացիների իրավունքների և պետության պարտավորությունների մասին. Թագուհի Ղազարյան
2018 թվականի ապրիլին ՀՀ-ում տեղի ունեցած աննախադեպ իրադարձությունները հիշատակելու և զգացողությունները վերակագնելու անհրաժեշտություն կարծում եմ էր կար, իսկ թե օրացույցում ևս մեկ տոն՝ «Քաղաքացու օր» ունենալն ինչքո՞վ ընդունելի կլինի հանրության համար՝ ժամանակը ցույց կտա. Tert.am-ի հետ զրույցում նման տեսակետ հայտնեց «Իմ քայլը» խմբակցության պատգամավոր Թագուհի Ղազարյանը:
«Հույս ունեմ, որ այդ համերաշխության մթնոլորտը ոչ թե մեկ օր միայն կվերականգնվի՝ տոնական օր դառնալով, այլ այն մեծ համերաշխության մթնոլորտը, որ ունեինք անցած տարի ապրիլ-մայիսին՝ շարունակական կլինի ՀՀ քաղաքացիների համար»,-ասաց նա:
Հիշեցնենք, որ Կառավարությունը հավանության է արժանացրել «Տոների և հիշատակի օրերի մասին» օրենքում լրացում կատարելու մասին օրենքի նախագիծը, ըստ որի՝Հայաստանի Հանրապետության քաղաքացու օրը նշվելու է ապրիլի վերջին շաբաթ օրը: Այն դեպքում, երբ մայիսի 1-ը կհամընկնի շաբաթ օրվա հետ, ապա որպես Հայաստանի Հանրապետության քաղաքացու օր նշվում է ապրիլի վերջին կիրակի օրը: Ըստ հիմնավորման, նախագծի ընդունման անհրաժեշտությունը պայմանավորված է 2018 թվականի ապրիլին Հայաստանի Հանրապետությունում տեղի ունեցած աննախադեպ քաղաքական իրավիճակով:
Հարցին, թե արդյոք օրացույցում նման օրը լինելո՞վ քաղաքացին իրենց պետք է գնահատված և կարևորված զգա իշխանությունների կողմից, Ղազարյանը նշեց, որ քաղաքացիները միշտ են կարևորվում: «Սա պարզապես ևս մեկ առիթ է՝ հիշելու քաղաքացիների իրավունքների և պետության՝ քաղաքացիների հանդեպ ունեցած պարտավորությունների մասին, գուցե խոսելու, բարձրաձայնելու առիթ է, բայց քաղաքացիները միշտ և ամեն օր նշանավորվում են»,-ասաց նա:
Հարցին, թե ինչպե՞ս են վերաբերում այն քննադատություններին, որ հեղափոխության գնահատականը պետք է պատմությունը տա, ճիշտ չէ, որ նույն իշխանությունն է նման օր սահմանում, պատգամավորը նշեց, որ քննադատություններ ամեն հարցի շուրջ էլ կան: «Չգիտեմ` դա քննատություն կարելի է համարել, թե ոչ, բայց յուրաքանչյուր հարցի շուրջ ցանկացած բնույթի ուռճացված խոսակցություններ լինում են, և նույնիսկ այդ օրը չլինելու պարագայում էր լինելու այդ խոսակցությունը: Այնպես որ ես կարծում եմ, որ պետք է նորմալ վերաբերվել արձագանքերին, մենք չենք կարող ունենալ միատարր հասարակություն, որ ցանկացած որոշման դեպքում միանման արձագանք ունենանք»,-ասաց նա:
Ինչ վերաբերում է իշխանությունների՝ այդ իրադարձությունները կարևորելուն, նշեց, որ համաձայն չէ դիտարկման հետ, քանի որ իրադարձություններն արդեն իսկ կարևորված են: «Դրանք արդեն իսկ անջնջելիորեն և անշրջելիորեն են կարևորված, և չեմ կարծում, որ դա պետք է խոսակցության առիթ դառնար»:
Դիտարկմանը, որ տոնացույցում բազմաթիվ են նման տոները, որոնք աննկատ անցնում են, պատգամավորն ասաց, որ ընդամենը տոների նկատմամբ վերաբերմունքը պետք է փոխել: «Օրինակ՝ մարտի 8-ի կամ հունիսի 1-ի վերաիմաստավորման կարիք կա, ուղղակի որպես առիթ օգտագործել այդ օրը՝ խոսելու այդ օրվա դերակատար մարդկանց կարևորության մասին»:
Պատգամավորն անդրադաձավ նաև այն քննադատություններին, որ անկարևոր հարցերի հետևից գնում են, կարևոր հարցերը թողնվում են մի կողմ, և նշեց, որ չի եղել այնպիսի հարց, որի շուրջ որոշում կայացվի, և գործողություն իրականացվի՝ սկսած Օպերայի սրճարանների ապամոնտաժումից,այլ հարց, և չխոսեն ու չասեն՝ մի՞թե դա ամենակարևոր թեման էր: «Այդ պարագայում ես ուզում եմ ունենալ ադ կարևոր թեմաների ցանկը, որովհետև ցանկացած թեմայի շուրջ նման խոսակցություն լինում է, կարծում եմ՝ անկարևոր թեմաներ չկան»,-ասաց նա: