Պետք է Արցախի դե յուրե անկախության հարցը շեշտվի, որից հետո կարելի է նստել բանակցությունների սեղանի շուրջ. Գագիկ Ծառուկյան
Ողջունում ենք, որ Արցախում ՀՀ-ի հետ առաջին անգամ տեղի ունեցավ անվտանգության խորհրդի միասնական նիստ, բայց այն, ինչ մենք սպասում էինք, ինչպես նաև հանրությունը, լիարժեք չստացանք. ԱԺ-ում լրագրողների հետ զրույցում ասաց ԲՀԿ խմբակցության ղեկավար Գագիկ Ծառուկյանը:
Իսկ թե ինչ էին սպասում, որ չբավարարեց նրանց, Ծառուկյանը պատասխանեց. «Ես նորից եմ ասում, որ Արցախի մասով, մեր մասով կիսատ մնաց հարցը, Արցախի մասին ոչ մի լիարժեք պատասխան չեղավ: Ալիևը լիարժեք ընդունեց Մինսկի խմբի համանախագահների հայտարարությունը, բայց մեր մասով անհասկանալի էր, հայկական կողմից լիարժեք շեշտադրում պետք է լիներ»,-ասաց նա՝ նկատի ունենալով համանախագահների հայտարարությունից հետո հայկական կողմի պատասխանը:
Ըստ ԲՀԿ առաջնորդի՝ 29 տարի արցախցին իր ինքնորոշման խնդիրը լուծել է՝ միջազգային բոլոր նորմերը պահելով, և դե ֆակտո Արցախն անկախ պետություն է: «Այսօր ինչպես Ադրբեջանն է, նույնն էլ է Արցախն է լիարժեք: Պետք է Արցախի դե յուրե անկախության հարցը շեշտվի, որից հետո կարելի է նստել բանակցությունների սեղանի շուրջ»:
Իսկ թե որն է ի վերջո նրանց ուզածը, Ծառուկյանն ասաց, որ վաղուց է ասել, որ արցախցին վաղուց խնդիրը լուծել է, և դե ֆակտո հայտարարել է իրեն որպես անկախ պետություն, ոչ թե միակողմանի պետք է տարածքները հանձնվեն, ինչի հիման վրա պետք է հանձնել:
Դիտարկմանը, թե գուցե հարցը դրված է, որ կա´մ տարածքներ պետք է վերադարձնեն, կա´մ պատերազմ կսկսի, Ծառուկյանը պատասխանեց. «Եթե Ադրբեջանը 20 տարի ձայն չէր հանում, նստած լռում էր՝ զինվելով, ամեն ինչ կարգավորելով, այսօր արդեն չի խոսում խաղաղ բանակցային ճանապարհով խնդրի լուծման մասին, միշտ ահաբեկում է: Դրա համար այն խնդիրը, որ կախված է Արցախի, մեր պետության, ժողովրդի ապագայի հետ, այսօր կապ չունի ընդդիմության, դիմության հետ: Ազգովի, Արցախ-Սփյուռք-Հայաստան պետք է միասնական լինենք, համախմբվենք, որովհետև դա ազգի ճակատագրի խնդիրն է: Համախմբվելով՝ մենք ինչ ունենք, կարճ ժամանակում պետք է կրկնապատկենք, եռապատկենք, որ հակառակորդն իմանա, որ լիարժեք ուժեղի հետ գործ ունի: Մենք կարողանանք մեր հիմնական հարցը, ինչի համար պայքարել ենք ու արյուն ենք թափել, կարգավորվել: Ես կարող եմ գրել ու ստորագրել, լուծումը միայն միասնականությունն է»,-ասաց նա: