Մենք նպատակահարմար չենք համարել Արթուր Գրիգորյանի պաշտոնավարումը. Տիգրան Ավինյան
ՀՀ կառավարությունում գործել է որոշակի պարգևավճարների համակարգ, և մեր գրասենյակի աշխատակիցները նույնպես ստացել են, ես ևս ստացել եմ որոշակի պարգևավճար՝ երևի 13-րդ աշխատավարձի չափով:
Այս մասին լրագրողների հետ զրույցում ասաց ՀՀ փոխվարչապետ Տիգրան Ավինյանը: Նա նշեց, որ պետական կառավարման համակարգի մակարդակը բարձրացնելու ջանքեր են թափում, և հենց դրան է ուղղված պետական ապարատում օպտիմալացումը:
Ինչ վերաբերում է Բնապահպանության և ընդերքի տեսչական մարմնի ղեկավար Արթուր Գրիգորյանի պաշտոնանկությանը և հարցին, թե արդյոք դա կապված էր «Ամուլսարի» հետ, ապա Տիգրան Ավինյանն ընդգծեց. «Տեսչական մարմինները ենթակա են կառավարությանը, և անձամբ իմ ենթակայության տակ չեն եղել դրանք, ես ընդամենը Կառավարության դիրքորոշումն եմ փոխանցել:
Ընդհանուր առմամբ թյուրընկալում կա վարչական պաշտոնների հետ կապված. նա զբաղեցնում էր վարչական պաշտոն, և իր լիազորությունների շրջանակն ամրագրված է օրենքով, դա մի պաշտոն է, որ պահանջում է այդ ոլորտում փորձ, որոշումները քաղաքական շրջանակներում չեն: Մենք նպատակահարմար չենք համարել պարոն Գրիգորյանի պաշտոնավարումը, որովհետև չենք տեսել, որ իր պաշտոնավարումը համապատասխանում է այն պաշտոնին, որին ինքը նշանակված է, վարչական պաշտոնում անկողմնակալություն ու անաչառություն է պահանջվում, որպեսզի հստակ այդ բալանսը կարողանանք գտնել և լիազորությունների շրջանակից երբևէ դուրս չգաս»:
Հիշեցնենք, որ պաշտոնանկությունից հետո Արթուր Գրիգորյանը ֆեյսբուքյան իր էջում գրել էր, որ ինքը չի պատասխանում լրագրողների հարցերին, քանի որ չգիտի, թե ինչ ասի: