ՍԴ-ն «ԱԺ կանոնակարգ» օրենքի սահմանադրականության հարցի նիստը լրացուցիչ ուսումնասիրության պատճառով է երկարաձգվել. ՍԴ մամուլի քարտուղար
2018 թվականի հոկտեմբերի 2-ին ԱԺ արտահերթ նիստում ընդունված «ԱԺ կանոնակարգ» օրենքի սահմանադրականության հարցի նիստը նշանակված էր հունվարի 22-ին, սակայն տեղափոխվել է ապրիլի 19-ին: Այս մասին Tert.am-ի հետ զրույցում ասաց Սահմանադրական դատարանի մամուլի քարտուղար Մարիաննա Հակոբյանը:
«Հանրապետության նախագահի դիմումի հիման վրա՝ «Ազգային ժողովի կանոնակարգ» ՀՀ սահմանադրական օրենքում լրացումներ և փոփոխություններ կատարելու մասին» ՀՀ սահմանադրական օրենքի 2-րդ հոդվածի 1-ին մասով նախատեսված 50-րդ հոդվածի 6-րդ մասի 2-րդ և 3-րդ կետերի՝ Սահմանադրությանը համապատասխանության հարցը որոշելու վերաբերյալ գործը լրացուցիչ ուսումնասիրության անհրաժեշտություն ունի: Սահմանադրական դատարանը որոշում է ընդունում դիմումը մուտքագրելուց ոչ ուշ, քան երեք ամիս հետո։ Սահմանադրական դատարանի պատճառաբանված աշխատակարգային որոշմամբ գործի քննության ժամկետը կարող է երկարաձգվել, բայց ոչ ավելի, քան երեք ամսով»,-ասաց նա:
Հարցին, թե ինչ ուսումնասիրության պատճառով է երկարաձգվել, նա ասաց, որ դա չի կարող ասել:
Հիշեցնենք, որ 2018 թվականի հոկտեմբերի 2-ին ԱԺ-ն արտահերթ նիստով ընդունել է «Ազգային ժողովի կանոնակարգ» սահմանադրական օրենքում փոփոխություններ և լրացումներ կատարելու մասին» ՀՀ օրենքի նախագիծը, ինչից հետո Նիկոլ Փաշինյանը քաղաքացիներին կոչ արեց հավաքվել Ազգային ժողովի մոտ։
Ըստ Սահմանադրության, Ազգային ժողովն ազատ է արձակվում, եթե վարչապետը հրաժարական է տալիս և 2 շաբաթում խորհրդարանը չի ընտրում նորին: «ԱԺ կանոնակարգի» համաձայն՝ ընտրության նիստը համարվում է չկայացած, եթե անգամ պատգամավորների բացակայության պատճառով քվորում չի ապահովվում։ Իսկ հոկտեմբերի 2-ի փոփոխությամբ, եթե խոչընդոտվում է պատգամավորների մասնակցությունը ԱԺ նիստին, այդ թվում՝ սպառնալիքի միջոցով, ապա Ազգային ժողովի նիստը համարվում է ոչ թե չկայացած, այլ ընդհատված, քանի դեռ չեն վերացել այդ խոչընդոտները։
Նախագահ Արմեն Սարգսյանը դեռևս չի ստորագրել օրենքը և դիմել է ՍԴ: