Թրամփը «տնտեսական ավերներով» է սպառնում Թուրքիային
Նախագահ Դոնալդ Թրամփը Թվիթերում տեղադրած գրառմամբ նախազգուշացրել է, որ թուրքական զորքի կողմից Սիրիայում Վաշինգտոնի աջակցությունը վայելող քրդական ջոկատների վրա հարձակման դեպքում Ամերիկան կձեռնարկի Թուրքիայի տնտեսության համար ավերիչ գործողություններ:
Սիրիայում քրդերի զինյալ խմբերը համարվում են Միացյալ Նահանգների դաշնակիցներն «Իսլամական պետության» դեմ պայքարում, մինչդեռ, Անկարան Սիրիայի հյուսիսարևելյան շրջաններում գտնվող այդ զինյալներին ահաբեկիչներ է անվանում:
Անկարայի հասցեին սպառնալիք հնչեցնելու հետ մեկտեղ Թրամփը Սիրիայի քրդերին հորդորել է «զերծ մնալ Թուրքիային սադրող քայլերից»:
Թրամփը հայտարարել է, թե Միացյալ Նահանգները սկսել է Սիրիայից զորքի «այդքան սպասված և ուշացած դուրսբերումը»:
Ամերիկան Սիրիայում 2014 թվականին տեղակայել է մոտ 2 հազար զինծառայող: Ըստ Պենտագոնի, արդեն մեկնարկել է ռազմական սարքավորումների և տեխնիկայի դուրսբերումը, և առաջիկա շաբաթների ընթացքում կսկսվի նաև մարդուժի դուրսբերումը:
Անկարան արդեն պատասխանել է Թրամփին. նախագահ Ռեջեփ Թայիբ Էրդողանի խոսնակը Թվիթերում գրել է, թե «Սիրիայի քրդերի և քուրդ զինյալների միջև հավասարության նշան դնելը ճակատագրական սխալ է»:
Միաժամանակ խոսնակը գրել է, թե Թուրքիան ակնկալում է, որ Միացյալ Նահանգները հավատարիմ կմնա Վաշինգտոնի և Անկարայի ռազմավարական գործընկերությանը:
«Մենք մի քանի անգամ ասել ենք, որ սպառնալիքներից չենք վախենում և տեղի չենք տա: Հետևաբար հնարավոր չէ մեր հասցեին տնտեսական սպառնալիքներ հնչեցնել և ինչ-որ արդյունքի հասնել», - ասել է Թուրքիայի արտգործնախարար Մևլութ Չավուշօղլուն:
Զորքը Սիրիայից դուրս բերելու Դոնալդ Թրամփի դեկտեմբերի 19-ի որոշումն անակնկալ էր տարածաշրջանում Միացյալ Նահանգների բոլոր դաշնակիցների համար:
Արաբական տարբեր մայրաքաղաքներում և Իսրայելում նկատել տվեցին, որ այդ որոշումը ձեռնտու է միայն Թեհրանին, Մոսկվային, Դամասկոսին և Անկարային, իսկ Սիրիայի քրդերն այդ վճիռը «դավաճանություն» են անվանել, քանի որ պարզ էր, որ հենց քրդական ջոկատները կդառնան Սիրիայի հյուսիսում թուրքական բանակի թիվ մեկ թիրախը:
Այդ որոշումն անսպասելի էր նաև ԱՄՆ բարձրաստիճան քաղաքական գործիչների համար: Ի պատասխան Թրամփի կարգադրության, հրաժարական է ներկայացրել պաշտպանության նախարար Ջիմ Մաթիսն, ով մեծ հարգանք ունի ոչ միայն Պենտագոնում, այլև Ներկայացուցիչների տանն ու Սենատում, ընդ որում և՛ հանրապետականների, և՛ դեմոկրատականների շրջանում:
Դոնալդ Թրամփն ասել էր, թե ամերիկյան զինուժը շատ արագ կհեռանա Սիրիայից, բայց օրեր անց նշել է, որ դուրսբերումը ժամանակ կպահանջի:
Թրամփն առաջարկում է ստեղծել մոտ 30 կիլոմետրանոց անվտանգության գոտի, որը կպաշտպանի քրդերին թուրքերի գրոհներից:
«Չեմ ցանկանա, որ քրդերն էլ, իրենց հերթին, սադրեն Թուրքիային, Ռուսաստանին, Իրանին և Սիրիային: Քրդերն ամենամեծ ներդրումն ունեն «Իսլամական պետությանը» ջախջախելու գործում, և մենք շնորհակալ ենք նրանց այդ բանի համար, սակայն հիմա պետք է մեր զորքը տուն վերադարձնել»,- գրել է Թրամփը:
Ի դեպ, Սիրիան հայտարարել է, թե պատրաստ է քննարկել քրդերին հուզող հարցերը:
«Սիրիայի կառավարությունը շարունակում է շփումները քրդերի հետ: Երկխոսությունը երբեք չի ընդհատվել: Մենք պատրաստ ենք քրդերին տալ երաշխիքներ, պայմանով, որ նրանք հավատարիմ կլինեն Սիրիայի տարածքային ամբողջականության և ժողովրդի միասնության գաղափարին», - երեկ ասել է Սիրիայի փոխարտգործնախարար Այման Սաուսանը: