SpaceX-ը 4-րդ անգամ հետաձգել է Falcon 9 հրթիռակրի արձակումը տիեզերք
Ամերիկյան Falcon 9 հրթիռակրի արձակումը չորրորդ անգամ հետաձգվել է եղանակային անբարենպաստ պայմանների պահպանման պատճառով:
Ինչպես գրում է Корреспондент-ը՝ վկայակոչելով SpaceX ընկերության թվիթերյան հաղորդագրությունը, ԱՄՆ ռազմաօդային ուժերի երրորդ սերնդի GPS III համակարգով զինված արբանյակը տիեզերք տեղափոխող հրթիռի արձակումը նախատեսված էր իրականացնել այսօր, սակայն հետաձգվել է ուժեղ քամիների պատճառով:
Նախատեսվում էր արձակումն իրականացնել Ֆլորիդայի Կանավերալ հրվանդանի կայանից: Սկզբնապես հրթիռի արձակումը պետք է տեղի ունենար դեկտեմբերի 18-ին, սակայն հետաձգվել էր ցուցիչների ոչ ստանդարտ տվյալների պատճառով: Հաջորդ օրը նույնպես արձակումը տեղի չէր ունեցել նույն պատճառով, իսկ դեկտեմբերի 20-ին՝ եղանակային անբարենպաստ պայմանների պատճառով:
Հրթիռակրի՝ տիեզերք արձակումն այս անգամ նախատեսվում է իրականացնել դեկտեմբերի 23-ին՝ կիրակի: