Անտոնիո Կասանոն կրկին հայտարարել է կարիերան ավարտելու մասին

Իտալիայի հավաքականի նախկին հարձակվող Անտոնիո Կասանոն կրկին հայտարարել է կարիերան ավարտելու մասին:

 

36-ամյա ֆուտբոլիստը նման հայտարարություն է արել C Սերիայի «Վիրտուս Էնտելա» ակումբում կարիերան վերսկսելուց մի քանի օր հետո.

 

«Սիրելի՛ ընկերներ, եկել է այն օրը, երբ հաստատապես որոշում ես, որ ամեն ինչ մոտեցել է ավարտին: Շնորհակալ եմ «Վիրտուս Էնտելային» և ակումբի նախագահին ինձ ընձեռած հնարավորության հըամար: Այս ակումբին ամենալավն եմ մաղթում:

 

Վերջին օրերին գիտակցեցի, որ հոգեբանորեն այլևս չեմ կարողանում կանոնավոր մարզումներ անցկացնել: Ֆուտբոլի համար կիրք և տաղանդ է հարկավոր, բայց ավելի կարևոր է հաստատակամությունը, որն այս պահին իմ առաջնահերթությունների թվում չէ:

 

Ցանկանում եմ շնորհակալություն հայտնել բոլոր ընկերներիս և թիմակիցներիս, որոնց հետ նախորդ տարիներին աշխատել եմ: Շնորհակալ եմ մրցակիցներիս, մարզիչներիս, նախագահներիս, որոնց հետ նաև վիճաբանություններ եմ ունեցել:

 

Ի վերջո, ցանկանում եմ շնորհակալություն հայտնել երկրպագուներին՝ բոլոր ակումբներիս և մրցակիցներիս, քանի որ առանց նրանց ֆուտբոլ չէր լինի»,- Կասանոյի խոսքը մեջբերել է «Football Italia»-ն:

 

Հիշեցնենք, որ Անտոնիո Կասանոն վերջին անգամ խաղադաշտ է դուրս եկել 2016 թվականին: 2017 թվականի ամռանը նա պայմանագիր կնքեց «Վերոնայի» հետ, սակայն մի քանի օր անց, ինչպես այժմ, հայտարարեց կարիերան ավարտելու մասին:

 

Կարիերայի ընթացքում Անտոնիո Կասանոն հանդես է եկել «Բարիում», «Ռոմայում», «Ռեալում», «Սամպդորիայում», «Միլանում», «Ինտերում» և «Պարմայում»: