Այսօրվա հեղափոխության ճշգրիտ «ռեցեպտն» է՝ անել այն, ինչ չի ուզում ՀՀԿ-ն և երկիրը կգնա առաջ. Ա. Մանուկյանը՝ արտահերթ ընտրությունների մասին
Ժողովուրդն իր ազատ կամքով եկավ, քվեարկեց և օրինականացրեց հրապարակի ցանկությունը. Tert.am-ի հետ զրույցում ասաց Հայ ազգային կոնգրես կուսակցության փոխնախագահ Արամ Մանուկյանը՝ անդրադառնալով Երևանի ավագանու ընտրությունների արդյունքներին:
«Այս ընտրությունները, ինչպես 1991թ թ.-ի ընտրությունները, երկու դեպքում էլ ժողովրդի գործոնն ամենակարևորն էր, որոշիչն ու ճակատագրականը: Ինչպես 91-ին էր ժողովուրդը ոգևորված, քեֆ-ուրախություն, մատաղ անելով էր իր ազատ կամքով մասնակցում ընտրություններին, որովհետև իր սրտի ուզածն էր, նույնն էլ հիմա էր՝ իր ազատ կամքով օրինականացրեց հրապարակի ցանկությունը»,-ասաց նա:
Ըստ Արամ Մանուկյանի՝ ժողովուրդը երկու անգամ աջակցեց հեղափոխությանը, մեկ անգամ հրապարակում, և երկրորդը այս ընտրությամբ: «Ժողովուրդն իր ազատ կամքով այդ ոգևորությունը վերածեց քվեաթերթիկի: Սա իսկական ժողովրդավարության հիմքն է, քանի որ ժողովուրդն իրեն զգում է իրավիճակի տեր, որոշիչ, հրամանատար, այդ տրամադրությունը հարկավոր է պահել, իր հույսներն արդացնել գործողություններով, քայլերով, որպեսզի առաջիկա ընտրություններն էլ լինեն նմանատիպ և չլինեն այլ գործիքներ՝ փող, կաշառք, վարչական լծակ, բարեկամ և այլն: Ազատ քաղաքացու գոյությունը երկրի ռեսուրսն է, մեծագույն հարստությունն է, այս պահին մենք ունենք մեծագույն հարստություն՝ ազատ կամքի տեր քաղաքացի»,-ասաց նա:
ՀԱԿ անդամը նկատեց՝ մանկամիտ է պետք լինել ասելու համար, թե 50 տոկոսից էլ պակաս մասնակցությունը չի կարող արտահայտել ժողովրդի կամքը: «Նախ 835 000 հայտարարած ցուցակն ամենևին իրական չէ, որովհետև տեսական մաքսիմում ցուցակ է, թե ովքեր կարող են ընտրական իրավունքից օգտվել, բայց իրականում արտագաղթը և բացականները այդ ցուցակից որ հանում ես, մոտավորապես այդ ցուցակը կարող է դառնալ 600 000, իսկ 600 000-ից նման մասնակցությունը տոկոսը բարձրանում է: Դրան գումարած նախորդ ավագանու ընտրությունների ժամանակ եթե 25 000 պակաս է, նրա մեջ դուք հաշվի առեք, որ բերած մարդիկ էին՝ միկրոավտոբուսներով, կաշառքով, վախեցնելով, տնօրենի հրամանով, այսօր չկային, այսօր եկած մարդիկ եկել էին ազատ, իսկ 2017-ին բերել են ստիպելով, այսինքն՝ ստացվում է՝ այս անգամ ակտիվությունը շատ ավելի բարձր էր»,-ասաց նա:
ՀԱԿ փոխնախագահն անդրադաձավ նաև վարչապետ Նիկոլ Փաշինյանի հայտարարությանը, թե ԱՄՆ-ից վերադառնալուն պես կձեռնարկի ԱԺ-ն ցրելու և արտահերթ խորհրդարանական ընտրություններ անցկացնելու քննարկումներ:
«ՀԱԿ-ը արդեն երեք-չորս հայտարարություն պաշտոնապես արել է և ամենաառաջինը մենք ենք արձագանքել և խիստ ենք դրել դրա անհրաժեշտությունը, ոչ թե արտահերթ ընտրությունների, այլ հնարավորինս շուտ արտահերթ ընտրությունների, քանի որ մենք գտնում ենք, որ հեղափոխության շրջանը փակելու միջոց է, և գտնում ենք որ ժողովուրդը, քանի որ այսպես ստեղծարար, ոգևորված ալիքի վրա է, այդ ալիքը խորհրդարանական ընտրություններով պետք է դարձնել մանդատ և քաղաքական կայունություն, երաշխիքներ, որ կարող ես ռեֆորմներ անել, քո առջև կանգնած մարտահրավերները լուծելու համար:
Ողջունելի է Փաշինյանի արած հայտարարությունը, որ պետք է հնարավորինս շուտ արտահերթ ընտրություններ անել»,-ասաց նա:
Արամ Մանուկյանը նշեց, որ ՀԱԿ-ը աջակցել է այդ պրոցեսին, Ընտրական օրենսգրքի փոփոխություններում առաջարկություններ է ներկայացրել հանձնաժողովին և տվել այն մոդելը, թե ինչպես կարելի է հասնել արագ արտահերթ ընտրությունների: «Պատրաստ ենք հիմա էլ նպաստել այդ պրոցեսին, որովհետև դա մեր երկրի համար լավագույն, ճշգրիտ քայլն է, որը այս պրոցեսը կդարձնի անշրջելի»,-ասաց նա:
Իսկ թե խոչընդոտներ տեսնո՞ւմ է, հաշվի առնելով, որ օրինակ ՀՀԿ-ն հայտարարել է, որ չի տեսնում դրա անհրաժեշտությունը, Արամ Մանուկյանն արձագանքեց. «Ես լուծումը ասել եմ այդ բանաձևի, և կրկնում եմ, հարկավոր է լսել, թե ՀՀԿ-ն ինչ է ուզում, անել հակառակը և կստացվի ճիշտ: Դա է այսօրվա հեղափոխության ճշգրիտ «ռեցեպտը», արեք այն, ինչ չի ուզում ՀՀԿ-ն և երկիրը կգնա առաջ»,-ասաց նա: