Չի կարելի երևանցիներին բաժանել խմբերի. Գագիկ Ծառուկյանը ելույթ ունեցավ ԲՀԿ հանրահավաքին, որն ավարտվեց «մենք բոլորս սպիտակ ենք» ֆլեշմոբով
Չի կարելի երևանցիներին բաժանել մասերի՝ խմբերի: Հյուսիսային պողոտայում «Բարգավաճ Հայաստանի» եզրափակիչ քարոզարշավին ելույթ ունենալով՝ հայտարարեց կուսակցության նախագահ Գագիկ Ծառուկյանը, ով բեմահարթակ էր բարձրացել սպիտակ հագուստով: Առհասարակ, բոլոր թեկնածուները սպիտակ հագուստով էին՝ առաջինից մինչև վերջին համար:
«Այսօր քարոզարշավի վերջին օրն է, ես առաջին օրը մասնակցեցի Նուբարաշենում՝ երկու խոսք ասացի, որ քարոզարշավի ժամանակ լինեն շատ կոռեկտ և երևանցիներին ներկայացնեն իրենց ծրագրերը, խնդիրներն ու պրոբլեմները: Առանց որևէ մեկի վրա ցեխ շպրտելու, ոչ թե մեկը մյուսին վիրավորի, այլ կարողանա ներկայացնի իր անելիքները: Բայց տեսանք, որ քարոզարշավը տարան «Բարգավաճ Հայաստանի» դեմ, մեր թիմի վրա ցեխ շպրտելով… Պարզ է, մենք ցանկացածին կարանք տանք պատասխան, մենք պատասխանը տվել ենք՝ փաստացի, դոկումենտալ: Միայն թույլը, որ ասելու բան չունի, կարող է ցեխ շպրտել, մենք ամեն ինչ տեսել ենք, պրակտիկորեն, ոչ թե թեորեապես։ Չի կարելի այսօր մեր երևանցիներին բաժանել մասերի՝ խմբերի»,– հայտարարեց ԲՀԿ առաջնորդը:
Շարունակելով նա ասաց նաև, որ մասնատելու դեպքում կորցնում են ամբողջը:
«Եթե երկու մեքենա իրար հարվածում են, անկախ ամեն ինչից, երկուսն էլ տուժում են, չի կարող մեկը օգտվել: Իրար վիրավորելով՝ երկուսն էլ տուժում են: Չի կարելի, դա մենք թույլ չենք տալու: Ամեն մարդ թող իր գործով խոսի»,- ավելացրեց նա:
Նա հիշեցրեց, որ 20 պետությունից հրավիրվել էին 38 քաղաքապետ, նրանց թվում եղել է քաղաքապետ, որի քաղաքում բնակվում է 22 միլիոն մարդ:
«Հրավիրել ենք իրենց հետ բանակցելու, քննարկելու, մեր ծրագրերը ներկայացրել ենք, իրենք ինչ են առաջարկելու»,- Գագիկ Ծառուկյանը նաև թվարկեց Երևանի քաղաքի խնդիրները՝ աղբահանություն, տրանսպորտ, պոլիկլինիկաներ, բնակարանաշինություն և այլն: ԲՀԿ առաջնորդը խոստացավ, որ հաղթելուց հետո անմիջապես բոլոր ծրագրերը իրականացվելու են, ներդրողները գալու են:
«Այսօր միջին երևանցին 6-7 հոգով ապրում է մեկ բնակարանում... հեր, մեր, հարս, երեխա, մենք սրա մասին պետք է մտածենք, միջին խավը, որ 68 տոկոսն է, 27 տարում բնակարան չի գնել, երեխա է ամուսնացնում, չգիտի՝ որտեղ բնակվի: Դրա համար պետք է թաղապետարաններից հողեր հատկացվեն, բնակարաններ կառուցվեն: Բնակարանի մեկ քառակուսի մետրի արժեքը 270 դոլար է լինելու, այսինքն՝ 65 հազար դրամով, 8-10 տարի վճարելով մարդը կարող է 2 սենյականոց բնակարանի տեր դառնալ։ Որ ասում եմ՝ իմ խոսքը գործ է, որևիցե մեկը չի կարող ասել՝ ասաց, չարեց»:
Նա նկատեց, որ իրենց ցուցակի առաջին համարը Նաիրա Զոհրաբյանն է, վերջինը՝ Վահե Էնֆիաջյանը, կթերանա Նաիրա Զոհրաբյանը՝ կանի Էնֆիաջյանը, Պետրոս Ղազարյանը: Այսինքն՝ կա թիմ, որը պետք է հասկանա, որ եթե ուշադիր չլինի երևանցու հանդեպ, ապա իր տեղը մշտական չէ:
«Էսօր ոչ մեկի հետ խոսել չի լինում, ոչ մեկի աչքերի մեջ փայլ չկա, նեղված են, հիասթափված են, կոտրված, չգիտեն՝ ինչ անեն: Հեղափոխություն եղավ, սպասում էին, որ վաղը լավը բան լինի, ես ուզում եմ՝ այդ ժպիտը վերականգնեմ: Կան խանգարողներ, «բզբզողներ», ուզում են պղտոր ջրի մեջ ձուկ բռնել: Ինձ ճիշտ հասկացեք՝ Ծառուկյանը կայուն մարդ է, Ծառուկյանը պաշտոնի համար գլուխ չի ջարդում: Ես չեմ ասում, ձեր ցավը տանեմ, պաշտոնի համար քո ձայնը տուր ինձ, ոչ, ես ասում եմ՝ մենք սա կարանք անենք, ձեր ցավը տանեմ, հավատում եք, պահանջում եք, տվեք, չէ՝ էլի ձեր ցավը տանեմ։ Խոսում եք ժողովրդից, ժողովրդավարությունից, էդպես էլ պետք է լինի»:
Գագիկ Ծառուկյանի ելույթից հետո ԲՀԿ հանրահավաքն ամփոփվեց «մենք բոլորս սպիտակ ենք» ֆլեշմոբով: