Ավագանու ընտրություններին ընդդիմությունը ներկայացված չէ, ընդդիմություն կարող էր լինել ՀՀԿ-ն. քաղտեխնոլոգ
Երևանի ավագանու ընտրություններին գոնե ֆորմալ առումով ընդդիմություն չկա՝ մասնակցողները կա՛մ իշխանություն կրող ուժերն են, կա՛մ քաղաքական ուժեր են, որոնք հայտարարել են, որ աջակից են այսօրվա իշխանություններին:
Այս մասին Tert.am-ի հետ զրույցում ասաց քաղտեխնոլոգ Վիգեն Հակոբյանը` հավելելով, որ ընդդիմությունը կարող էր լինել միայն ՀՀԿ-ը, որը չի մասնակցում ընտրություններին ցածր արդյունք չգրանցելու համար:
«Կարծում եմ, որ, երբ չկա քաղաքական ընդդիմություն, հիմնականում փորձ է արվելու ծրագրերի միջոցով այս կամ այն ոլորտի վրա շեշտը դնել: Այսինքն՝ չի լինելու սուր քննադատություն գործող իշխանությանը, այստեղ շատ-շատերի համար հիմնական թիրախը մնալու է ՀՀԿ-ն՝ որպես քաղաքային նախկին իշխանություն: Ասելու են, որ ի տարբերություն նախորդների՝ մի շարք գործողություններ չեն անելու, փոխարենն այլ խոստումներ, ծրագրեր են ներկայացնելու»,-շեշտեց քաղտեխնոլոգը:
Քաղտեխնոլոգի խոսքով` չնայած նրան, որ Երևանի ավագանու արտահերթ ընտրությունների քարոզարշավը պաշտոնապես չի մեկնարկել, քարոզարշավի ստարտը տրվել է այն պահից, երբ քաղաքական ուժերը հայտարարել են մասնակցության մասին: Նա հավելեց, որ բուն քարոզարշավը բավականին ակտիվ է լինելու` հաշվի առնելով նաև այն, որ հեղափոխությունից հետո առաջին ընտրությունն է: Ըստ նրա `քարոզարշավի, ընտրությունների ընթացքում փորձարկվելու են նաև նոր ընտրական, քաղաքական տեխնոլոգիաներ: Քաղտեխնոլոգն ընդգծեց, որ ՔՊ-ի հետ կապված դրական տրամադրությունները, որոնք ձևավորվել են հեղափոխության ընթացքում, դեռևս պահպանվում են, շանս ունեն իրական մեծամասնություն վերցնելու:
«Իրական մեծամասնություն կարող են լինել` նույնիսկ առանց հետընտրական դաշինքներ կազմելու և պայմանավորվածությունների գալու ավագանի անցած այլ ուժերի հետ, բայց դժվար է ասել, թե ճնշող մեծամասնություն կլինի, թե չէ, որովհետև շատ բան կախված է նաև քարոզչությունից: Բացի նրանից, որ Երևանում ընտրելու են ավագանու քաղաքական ուժեր, ընտրվում է նաև կոնկրետ անձը: Շատ բան կախված է լինելու նրանից, թե ասենք Հայկ Մարությանը ինչ կերպարով հանդես կգա. հասարակության մոտ իր հետ կապված շատ հարցեր կան, բայց ամեն կախված է լինելու նրանից, թե արդյոք ինքը հանդես կգա մենեջեր կերպարով բացի հայտնի դերասան լինելուց, հանդես կգա՞ որպես հաջողակ բիզնեսմեն: Կարծես թե, նման հայտարարություններ այս առումով արվում են»,-նշեց նա:
Վիգեն Հակոբյանն ասաց, որ հաջողությունը կախված կլինի նաև նրանից, թե թեկնածուներն իրենց համար քաղաքապետարանում այս կամ այն ոլորտի պատասխանատուների ինչպիսի թիմ կներկայացնեն:
Քաղտեխնոլոգը կարծում է, որ կարևոր նշանակություն կունենա նաև այն, թե Նիկոլ Փաշինյանը ինչպիսի մասնակցություն կունենա քարոզարշավին, որովհետև, երբ խոսվում է քաղաքական իշխող ուժի, թիմի վարկանիշի մասին, խոսքն առաջին հերթին գնում է Նիկոլ Փաշինյանի վարկանիշի անձնավորված ընկալման մասին: