Իշխանական ագիտպրոպը երեկվանից խառնվել է իրար` վարչապետի աշխատակազմի ղեկավարի սկանդալային շրջաբերականի հետ կապված. Արմեն Աշոտյան
Իշխանական ագիտպրոպը երեկվանից խառնվել է իրար` վարչապետի աշխատակազմի ղեկավարի սկանդալային շրջաբերականի հետ կապված:
Այս մասին ֆեյսբուքյան իր էջում գրել է ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը։
«Է՛լ Հ1, է՛լ «Ազատություն», է՛լ բլոգերներ, է՛լ իշխանության լծակներին հասած ՀԿ-ներ:
Ակնհայտ չբավարարվելով վարչապետի մամլո խոսնակի ոչ շատ հաջող հայտարարությամբ (Մի խումբ պաշտոնյաններ, Կառավարությունում մնալով, կոռուպցիա են քարոզում. վարչապետի մամուլի խոսնակը՝ ԶԼՄ-ների հետ առնչվելու կարգի անհրաժեշտության մասին) և չսպասելով վարչապետի պաշտոնական արձագանքին, փորձում են ետ բերել երեկվա կորցրածը:
Հարգելի՛ գործընկերներ, մի՛ շտապեք, առավել խոհեմ կլինի դադար վերցնել, տեսնել՝ թեման ինչպես է զարգանալու:
Արխիվային կադրերն էլ ազատ տնօրինեք, բայց միակողմանի մի՛ եղեք, օրինակ, վերհիշե՛ք նաև Նիկոլ Փաշինյանի զանազան գնահատականները՝ ԱԺ-ում հնչեցրած: Թե՞ իրողության փոփոխությունը միայն ԵԱՏՄ-ից և ՀԱՊԿ-ից դուրս գալու կոչերին էր վերաբերվում։)
Կրկնում եմ՝ բարձրացված թեման և վարչապետին ուղղված հարցերը բացառապես իրավական հարթության մեջ են: Ու վարչապետի պատասխանից կախված, որը նա պարտավոր է տալ ՀՀ Սահմանադրության 112 հոդվածի շրջանակներում, խոստանում եմ թեմայի շարունակություն:
Հիշեցնենք, որ երեկ Արմեն Աշոտյանը ֆեյսբուքյան գրառմամբ հայտարարել էր, որ վարչապետի աշխատակազմի ղեկավարի շրջաբերականը սահմանափակելու է տեղեկատվության տրամադրման ազատությունը։
Մեկնաբանելով շրջաբերականի անհրաժեշտությունը՝ վարչապետի մամուլի խոսնակ Արման Եղոյանը Tert.am–ի հետ զրույցում շեշտել էր, որ մի խում պաշտոնյաներ, մնալով Կառավարությունում, կոռուպցիա են քարոզում։