ԱԺ 4 խմբակցություններից միայն ՀՀԿ-ն է դեմ 100% համամասնական ընտրակարգին. ըստ Սերգեյ Բագրատյանի՝ ԸՕ-ի փոփոխությունների համար 1 տարի ժամանակ ունեն
ԱԺ 4 խորհրդարանական խմբակցություններից 3-ն առաջարկել են վարկանիշային ընտրակարգի փոփոխություն, այսինքն՝ 100 տոկոս համամասնական ընտրակարգով գնալ: Tert.am-ի հետ զրույցում ասաց «Ծառուկյան» խմբակցության պատգամավոր Սերգեյ Բագրատյանը, ով Ընտրական օրենսդրության բարեփոխումների նպատակով ձևավորված խորհրդարանական հանձնաժողովի անդամ է: Ըստ Բագրատյանի՝ ՀՀԿ-ն ցանկանում է, որ վարկանիշային ընտրակարգը մնա, իսկ «Ծառուկյան», «Ելք» և ՀՅԴ խմբակցությունները առաջարկում են հանել ռեյտինգային ընտրակարգը:
Հիշեցնենք, որ Ընտրական օրենսդրության բարեփոխումների նպատակով ձևավորված խորհրդարանական 4 խմբակցության ներկայացուցիչներից կազմված աշխատանքային խմբի առաջին նիստը տեղի է ունենալու հուլիսի 4-ին: Բոլոր խմբակցությունների 3-ական ներկայացուցիչները համաձայնել են, որ կառավարության կողմից ստեղծված հանձնաժողովի հետ աշխատեն փոխհամաձայնեցված և փոխգործակցված:
Հաջորդ կարևոր առաջարկն, ըստ նրա, կրկնաքվեարկությունները բացառելու հնարավորություններ ստեղծելն է: «Այս 2 փոփոխություններն են առանցքային, և խնդիր է դրված՝ սրանք կարողանալ շտապ շտկել»,-ասաց Բագրատյանը՝ շեշտելով, որ հանձնաժողովների առաջարկությունները կլինեն ԸՕ-ի փոփոխության առաջնահերթությունների շուրջ, քանի որ երկարաժամկետ փոփոխություններ այս պահին չեն կարող անել՝ շատ ավելի աշխատատար լինելու պատճառով:
Սերգեյ Բագրատյանի խոսքով՝ առաջարկություններ կան նաև զինվորների քվեարկության հետ կապված: «Զինվորների քվեարկության հարցում ևս մտավախություններ ունենք, պետք է փոփոխություններ առաջարկվեն, որպեսզի սպաները չկարողանան զինվորների կամարտահայտման վրա ազդել: Մենք առաջարկում ենք՝ սպաները առնվազն 100 մետրից ավել հեռու մնան ընտրատեղամասից, որպեսզի զինվորներն ազատ քվեարկությանը մասնակցեն»,-ասաց նա:
Բագրատյանի խոսքով՝ նաև առաջարկություն ունեն ընտրողներին ուղղորդելու խնդրով, երբ պատճառաբանում են, թե ընտրողը լավ չի տեսնում կամ հիվանդ է, չի կարող միայնակ ընտրել, և ուղեկցողները ուղղորդում էին ընտրությունները տեղամասերում: «Այդ խնդրի դեպքում մենք առաջարկում ենք, որ բժշկի թղթով գան այն ընտրողները, ովքեր իսկապես ի վիճակի չեն ընտրել, և նրանց կարելի է նոր ուղեկցել»,-ասաց նա:
Մյուս առաջարկը վերաբերում է ԶԼՄ-ների մասնակցությանը: Ըստ Բագրատյանի՝ իրենք առաջարկում են հանել ցանկացած սահմանափակում:
ԱԺ պատգամավորը նշեց, որ հույս ունեն առնվազն մինչև մեկ տարում հասցնել ավարտել: «Մինչև մարտ, ապրիլ հասցնենք լավ Ընտրական օրենսգիրք ունենալ և լավ պայմաններ ստեղծել՝ ընտրություններ կազմակերպերու համար: Համենայն դեպս կառավարությունը նույնպես նշում էր մինչև 1 տարի ժամանակը»,-ասաց նա և նշեց, որ Կառավարության ներկայացուցիչներն առաձին ձևաչափով աշխատանքներ կկատարեն, բայց ԱԺ աշխատանքներին կմասնակցեն:
Ըստ Սերգեյ Բագրատյանի՝ այս կարևորագույն փոփոխությունների դեպքում, իհարկե, գերադասելի է ունենալ միջազգային հանրության, կոնկրետ Վենետիկի հանձնաժողովի համաձայնությունը: «Իհարկե դրական կազդի ընտրությունների ճանաչման իմաստով»,-ասաց նա: