Ալեքսիս Օհանյանը ծառ է տնկել Հայաստանում և այն անվանել «Օլիմպիա»
Ամերիկահայ գործարար, Reddit սոցիալական ցանցի համահիմնադիր Ալեքսիս Օհանյանը լուսանկար է հրապարակել Twitter-ում՝ հայտնելով, որ ծառատունկի է մասնակցել «ԹՈւՄՈ» ստեղծարար տեխնոլոգիաների կենտրոնի բակում:
«Տնկելով առաջին ծառը (հուսով եմ՝ շատերից մեկը) ԹՈւՄՈ-ի հարևանությամբ», - լուսանկարին կից գրել է Օհանյանը:
«Այս մեկն անվանել եմ «Օլիմպիա»: Նա այժմ երկու ծառ ունի, մեկական իր տներից յուրաքանչյուրի դիմաց՝ Ֆլորիդայում և Հայաստանում», - հավելել է Օհանյանը՝ նկատի ունենալով իր և թենիսիստուհի Սերենա Ուիլյամսի 10-ամսական դստերը՝ Օլիմպիա Ալեքսիս Օհանյանին:
Հիշեցնենք, որ Հայաստանում գտնվելով՝ Ալեքսիս Օհանյանը հանդիպում է ունեցել վարչապետ Նիկոլ Փաշինյանի հետ՝ տեղեկացնելով, որ սա իր 6-րդ այցն է հայրենիք: Զրուցակիցները քննարկել են ՏՏ ոլորտում համագործակցությանը և Ալեքսիս Օհանյանի կողմից Հայաստանում գործունեություն ծավալելու հնարավորություններին վերաբերող հարցեր: