Քաղաքական հնչեղություն ունեցող գործերից հայտնի դատավորը վճռեց՝ ազատ արձակել Մասիսի քաղաքապետին
Մասիսի քաղաքապետի փաստաբան Տիգրան Աթանեսյանը լրագրողների հետ զրույցում ասաց՝ այս գործով բավարար չափով ապացույցներ չեն եղել։ «Ազատության» դիտարկմանը, թե վարույթն իրականացնող մարմնի տրամադրության տակ կան համապատասխան տեսանյութեր, Աթանեսյանն արձագանքեց. «Տեսանյութերը դեռ ապացույց չեն։ Մենք գործ ունենք քննչական մարմնի վատ աշխատանքի հետ։
Քննչական կոմիտեի նախագահի խորհրդական Սոնա Տռուզյանը, մինչդեռ, «Ազատությանը» փոխանցեց, թե միայն տեսանյութերի հիման վրա չէ, որ մեղադրանք է առաջադրվել, հետևաբար բողոքարկելու են դատարանի որոշումը։ Տռուզյանի խոսքով՝ առկա են բավարար ապացույցներ մեղադրանք առաջադրելու համար, իսկ ապացույցներն այս փուլում չէ, որ պետք է քննարկվեն: Նախաքննությունը, ըստ նրա, շարունակվում է և ձեռնարկվում են անհրաժեշտ բոլոր գործողությունները՝ դեպքի բոլոր հանգամանքները պարզելու համար:
Քննիչը դիմել է հսկողություն իրականացնող դատախազին՝ քննարկելու դատարանի որոշումները բողոքարկելու հարցը։ Վարույթն իրականացնող մարմինը մտավախություն ունի, որ գործի օբյեկտիվ քննությունը կարող է վտանգվել։ Մամուլի տեղեկություններով՝ Մասիսի քաղաքապետը նախկին ոստիկանապետ Վլադիմիր Գասպարյանի թիկնազորի պետ Արշակ Հակոբյանի դստեր ամուսինն է: Մասիսի քաղաքապետը, նրա տեղակալ Կարեն Օհանյանն ու ևս երեք անձ, հիշեցնենք, անցնում են ապրիլի 22-ին Էրեբունիում տեղի ունեցած զանգվածային անկարգությունների գործով:
Ըստ քննչական կոմիտեի, այդ օրը քաղաքացիական հագուստով մարդիկ, հիմնականում՝ բժշկական դիմակներով, հարձակվել են խաղաղ ցուցարարների վրա, քարերով ու մահակներով հարվածել նրանց։ Քաղաքացիների նկատմամբ բռնություն էր գործադրվել նաև էլեկտրահարող սարքերով: Զանգվածային անկարգություններ կազմակերպելու ու դրանց մասնակցելու մեջ մեղադրվող քաղաքապետն այսօր «Ազատության» հետ զրույցում ասաց, թե որևէ տեսանյութ չկա, որով կարող են ապացուցել իր մասնակցությունը։
«Ազատություն»- Դուք տեղյակ չե՞ք եղել, որ Էրեբունիում դիմակավորված անձինք մահակներով հարձակվել են ցուցարարների վրա:
Համբարձումյան- Ոչ: Պատվեր տալով, կեղծիք տալով չեն կարող մարդուն մեղադրել։
«Ազատություն» - Քաղաքապետի պաշտոնից հրաժարական չե՞ք տալու։
Համբարձումյան- Իհարկե ոչ։ Ես պատասխանատու եմ ընտրողների առջև։ Ինչի՞ համար պետք է հրաժարական տամ։
Դատարանն այսօր մերժեց նաև Մասիսի փոխքաղաքապետ Կարեն Օհանյանին կալանավորելու վերաբերյալ միջնորդությունն ու նրա ձերբակալման որոշումը ևս ոչ իրավաչափ ճանաչեց: Այս մասին լրագրողներին ասացին փոխքաղաքապետի փաստաբաններ Զորայր Հարությունյանն ու Էրիկ Ալեքսանյանը: Օհանյանը հրաժարվեց որևէ հարցի պատասխանել:
Նշենք՝ Մասիսի քաղաքապետին և փոխքաղաքապետին ազատ արձակած դատավորն ընդդիմադիր գործիչ Ժիրայր Սեֆիլյանին 10 տարի 5 ամիս ժամկետով ազատազրկման դատապարտած Տաթևիկ Գրիգորյանն է, ով դատաքննության ընթացքում, մինչև վճռի հրապարակումը, բազմիցս մերժել է Սեֆիլյանին ու նույն գործով մյուս մեղադրյալներին կալանքից ազատելու միջնորդությունները, պնդելով, թե ազատության մեջ հայտնելով, նրանք կխոչընդոտեն գործի քննությանն ու կթաքնվեն դատարանից:
Այսօր ավելի վաղ դատարանը բավարարել էր Էրեբունիում տեղի ունեցած անկարգությունների գործով մեղադրվող անձանցից մեկին՝ Գոռ Խաչատրյանին կալանավորելու՝ Քննչական կոմիտեի միջնորդությունը։ Եվս երկուսի՝ Մասիսի քաղաքապետի հորեղբոր որդու՝ Գևորգ Համբարձումյանի և Սարգիս Սահակյանի նկատմամբ կալանավորման միջնորդությունը մերժվել էր: Նրանց նկատմամբ ևս խափանման միջոց է ընտրվել ստորագրությամբ չհեռանալը:
Ի դեպ, Ազգային ժողովի Հանրապետական խմբակցության 8 պատգամավորներ ավելի վաղ դիմել էին գլխավոր դատախազ Արթուր Դավթյանին և Քննչական կոմիտեի ղեկավար Աղվան Հովսեփյանին՝ առաջարկելով իրենց անձնական երաշխավորությամբ ազատ արձակել Մասիսի քաղաքապետ Դավիթ Համբարձումյանին և այս գործով մյուս 4 ձերբակալվածներին: