Թանկացումներն արհեստածին են, օրինական հարկային դաշտ մտնելուց հետո թանկացումներ պետք է չլինեին. տնտեսագետ

Համամիտ չեմ այն տեսակետի հետ, թե գործարարների՝ օրինական հարկային դաշտ մտնելուց հետո պետք է թանկացումներ լինեին: Tert.am-ի հետ զրույցում նման տեսակետ հայտնեց տնտեսագետ Թաթուլ Մանասերյանը: Նրա կարծիքով՝ պարզապես ժամանակն է, որ պետական մարմինները լուրջ կատարեն իրենց վերահսկողական գործառույթները և գործեն համախմբված:

- Պարո՛ն Մանասերյան, խոշոր առևտրային ցանցերում որոշ ապրանքների թանկացումներ են եղել, ինչը պատճառաբանվում է խոշորների՝ հարկային դաշտ մտնելով: Զուգահեռ, վարչապետ Նիկոլ Փաշինյանը հայտարարում է, թե  թանկացումներն արհեստածին են: Արդյո՞ք օրինական դաշտում գործելը կարող էր թանկացումների պատճառ դառնալ:

- Համամիտ չեմ այն տեսակետի հետ, թե գործարարների օրինական հարկային դաշտ մտնելուց հետո պետք է թանկացումներ լինեին: Կարծում եմ՝ արհեստածին է,  այս պարագայում համամիտ եմ վարչապետի հետ: Խնդիրն այն է, որ պետական մարմինները, հատկապես ՏՄՊՊՀ-ն, հարկային մարմինները, Տնտեսական զարգացման և ներդրումների նախարարությունը, Գյուղատնտեսության նախարարությունը պետք է խորամուխ լինեն և հասկանան, թե իրականում ինչպես են ձևավորվում գները, ապրանքի ինքնարժեքը, ծախսերն ինչպիսն են, արդյոք կա՞ն մարդիկ, ովքեր ցանկանում են գերշահույթ ստանալ: Սա պետք է պարզապես արմատախիլ անել և թույլ չտալ, հատկապես հիմա, երբ գյուղատնտեսական աշխատանքները նոր են սկսել և  նման չարաշահումները՝ խմբիշխանների գինը թելադրելը, պետք է բացառել, որովհետև մենք չեն կարող հարկատուի գրպանի հաշվի նման բան թույլ տալ:

- Խնդիրն այն է, որ նախկին իշխանությունը հայտարարում է, որ ՊԵԿ-ի հետ գործարարներն օրենքը շրջանցելու տարբերակ են գտել, որպեսզի խուսափեն գյուղմթերքի թանկացումից:

- Կարծում եմ՝ գունազարդում ու չափազանցնում են իրավիճակը: Այսօր բացահայտումներ կան, այսինքն՝ նեղ անձնական պայմանավորվածությունների պատճառով ամբողջ երկրում գնագոյացում է տեղի ունեցել: Այս հարցը լուրջ ուսումնասիրության և մշտական վերահսկողության կարիք ունի: Այսինքն՝ պետությունն իր կարգավորիչ ու վերահսկիչ մեխանիզմները պետք է ամեն օր իրականացնի պատշաճ մակարդակով:

- Տեսակետ կա, որ, քանի դեռ նոր խաղի կանոններով մրցակցային միջավայր չկա կարող էին թանկացումներ լինել:

- Չեմ կարծում, որ նոր խաղի կանոններ պետք է լինեն, խաղի կանոնները մեկն է՝  շուկայի պահանջարկի ու առաջարկի հարաբերակցություն, որի հատումից ձևավորվում է գինը: Այլ ուժեր, որոնք ոչ շուկայական ուժեր են ու փորձում են մենաշնորհել դաշտը, գերիշխող դիրք գրավել, գին թելադրել, այս սրանց դեմ պետք է պայքարել, քանի որ դա է, որ շուկան հավասարակշռությունից դուրս է բերում: Քաոսային իրավիճակի լինելը չեմ բացառում, բայց, անկախ իշխանությունների ով լինելուց,  խաղի կանոնները բոլորի համար նույնը պետք է լինեն՝ օրենքով սահմանված առողջ մրցակցություն, հակամենաշնորհային գործընթաց և այլն: Անգամ այս անցումային փուլում պետք է պետական մարմիներն իրենց գործառույթը հստակ իրականացնեն, այլապես քաոսը կարող է անկառավարելի դառնալ:

- Վերջին տարիներին մի քանի անգամ Հարկային օրենսգրքում փոփոխություն է եղել, արդյոք հնարավոր չէ՞ր օրենսդրական կարգավորումները բերել այնպիսի մակարդակի, որ գործարարն աշխատեր օրենքի դաշում, սակայն արդյունքում չտուժեր ո՛չ սպառողը, ո՛չ գործարարը:

- Օրենքները, որոնք գործում են ՀՀ-ում մեծ մասամբ ընդունելի են և դրանցով կարելի է ղեկավարվել և կարգավորել տնտեսական մրցակցության ոլորտը: Դրա հետ միասին, պետական մարմիները պետք է ավելի առողջ ու նպատակային գործեն, իրենց գործառույթները պետք է թերի չկատարեն, քանի որ այդ դեպքում է, որ մենք ունենում ենք նման իրավիճակ: Իհարկե, կարելի է փոխել Հարկային օրենսգիրքը, փոխել ու տարբերակված քաղաքականություն վարել փոքր բիզնեսի համար, քանի որ փոքր բիզնեսն առանձին հոգատարության կարիք ունի, միջինը՝ առանձին, մեծն՝ առանձին: Բոլորին պետք է միառժամանակ փորձել ինտեգրել ազգային տնտեսության մեջ: Սակայն սրա հետ մեկտեղ պետական մարմինների կարգապահությունը և համադրված գործողությունները կաղում են, հատկապես Տնտեսական զարգացման  ներդրումների նախարարությունը պետք է լինի իր բարձրության վրա, հանձնաժողովները և այլ պետք է համակարգված գործեն: Ժամանակն է, որ թիմային աշխատանք լինի, սա լավագույն առիթն է, որովհետև Կառավարությունը՝ վարչապետից սկսած, երիտասարդ նախարարներով ավարտած, մեծ ցանկություն ունեն բարեփոխելու և ոլորտն առողջացնելու, պարզապես համադրված գործողություններն այստեղ այլընտրանք չունեն: Օրենքները մշտապես կարելի է  կատարելագործել, իսկ ովքեր են իրականացնում քաղաքականություն, այ սրանից շատ բան է կախված:

- Որքանո՞վ եք համակարծիք այն տեսակետի հետ, որ գյուղմթերքը թանկացումը պայմանավորված է նրանով, որ գյուղատնտեսական ոլորտը չի հարկվում, ինչը խնիդիրներ է առաջացնում փաստաթղթաշրջանառության հետ:

- Դրանք բազմաթիվ հարցերի ամբողջությունն են, եթե Գյուղատնտեսության նախարարությունը, Տնտեսական զարգացման  ներդրումների նախարարությունը ցանկություն ունեն մասնագիտական կարծիքի ու գիտական հիմնավորումների, ապա մենք կարող ենք տալ:  Փորձագետներն այդ կառույցներին չեն խնդրելու, որ պետական մարմիներն իրենց միտքն օգտագործեն: Կարող եմ ասել, որ մենք պետական գնումների, մթերումների, գյուղկոոպերացիայի, սպառողական կոոպերացիայի վերաբերյալ ունենք բավական լուրջ մշակված ծրագիր, որը լուծում է այն հարցերը, որոնք ամեն անգամ ծանրանում են կառավարության առջև: