Իրանի նկատմամբ կիրառվող պատժամիջոցները էական ազդեցություն չեն ունենա հայ-իրանական հարաբերությունների վրա. իրանագետ
ԱՄՆ-ի կողմից Իրանի նկատմամբ կիրառվող պատժամիջոցները այս պահի դրությամբ չեն կարող էական ազդեցություն ունենալ Հայաստանի վրա, Հայաստանը կշարունակի իրագործել նախանշված ծրագրերը:
Այս մասին Tert.am-ի հետ զրույցում ասաց իրանագետ, Միջազգային և անվտանգության հարցերի հայկական ինստիտուտի փորձագետ Արմեն Վարդանյանը:
Հիշեցնենք, որ ԱՄՆ նախագահ Դոնալդ Թրամփը հայտարարել էր Իրանի հետ վեցյակի հայտնի միջուկային համաձայնագրից դուրս գալու մասին՝ ասելով, որ 180 օրերի ընթացքում կվերականգնվեն այդ գործով Իրանի դեմ պատժամիջոցները, և կկիրառվեն նորերը:
«Պետք է ասել, որ ամերիկյան կողմը մինչ այժմ պաշտոնապես և ոչ պաշտոնապես հայտարարել էր, որ Հայաստանը կարող է հանգիստ իրագործել իրանական կողմի հետ նախանշված ծրագրերը, եթե դրանք կապված չեն միջուկային ծրագրի հետ կամ այն ընկերությունների հետ, որոնք կապված են Իսլամական հեղափոխության պահապանների կորպուսի հետ: Պատժամիջոցները չեն կարող ազդեցություն ունենալ Արաքս գետի վրա ՀԷԿ-ի կառուցման վրա, հայ-իրանական սահմանին ազատ տնտեսական գոտու վրա և ոչ էլ գազի հնարավոր մատակարարման բանակցությունների վրա»,- շեշտեց Արմեն Վարդանյանը:
Ըստ նրա՝ միակ մտահոգությունն այն է, որ Մերձավոր Արևելքում լարվածությունը կմեծանա:
Իրանագետը կարևոր համարեց այն, որ չնայած իրանական միջուկային համաձայնագրից ԱՄՆ-ի դուրս գալուն՝ Գերմանիան, Ֆրանսիան, Մեծ Բրիտանիան, Ռուսաստանը և Չինաստանը մտադիր են նախկինի պես կատարել համաձայնագրով նախատեսված պարտավորությունները:
«Սա նշանակում է, որ Իրանի նկատմամբ միջազգային նոր պատժամիջոցներ դեռ չեն լինի, ԱՄՆ-ը դեռ միայն միակողմանիորեն կարող է պատժամիջոցներ կիրառել: Իրանն էլ այս պահի դրությամբ կտրուկ հայտարարություններ չի անում: Իրանը կարող է երկու տարբերակ դիտարկել:Առաջին՝ ինքն էլ իր կողմից դուրս գա Միջուկային համաձայնագրից և այլևս կաշկանդված չլինի այդ համաձայնագրով, ուրանի հարստացումը հասցնի 20 տոկոսի, այսինքն՝ գնա միջուկային զենքի ստեղծմանը: Տարբերակ երկրորդ՝ Իրանը կշարունակի հավատարիմ մնալ համաձայնագրին և այժմ կաշխատի համաձայնագրի մյուս կողմերի հետ՝ ԵՄ-ի, ՌԴ-ի և Չինաստանի: Ներկա դրությամբ կարծես թե հավանական է համարվում երկրորդ տարբերակը»:
Արմեն Վարդանյանը նաև ընդգծեց, որ վեցյակի դիրքորոշումը չի կարող ազդել ԱՄՆ նախագահի քաղաքականության վրա, որոշումը չի կարող փոխվել. մինչ հայտարարություն կատարելն էլ իրազեկված էր, որ ԵՄ-ը դեմ է իր քաղաքականությանը:
Հիշեցնենք, որ Թրամփը «խիստ անհաջող և ձախողված» է անվանել նախկին նախագահ Բարաք Օբամայի պաշտոնավարման օրոք կնքված պայմանագիրը՝ նշելով, որ այն Թեհրանին ընձեռել է միջուկային զենքի ստեղծման ուղղությամբ աշխատանքը շարունակելու հնարավորություն: ԱՄՆ նախկին փոխնախագահ Ջո Բայդենը պայմանագրի չեղարկումը «կոպիտ սխալ» է անվանել:
Իրանի նախագահ Հասան Ռոհանին ասել է, թե ԱՄՆ-ը ապացուցեց, որ չի հարգում ստանձնած միջազգային պարտավորությունները: Մեծ Բրիտանիան, Ֆրանսիան և Գերմանիան, Չինաստանը, ՌԴ-ը հայտնել էին, որ շարունակելու են մասնակցել պայմանագրի իրագործմանը:
Անի Գևորգյան