ՀՀ կառավարությունը Արցախին մոտ 9 մլն ՀՀ դրամ արժողությամբ լուսացուցային օբյեկտներ կնվիրաբերի
Վաղը կառավարության հերթական նիստին չզեկուցվող հարցերի շրջանակում է Արցախի Հանրապետությանը գույք նվիրաբերելու և Հայաստանի Հանրապետության կառավարության 2018 թվականի փետրվարի 1-ի N 77-Ա որոշման մեջ փոփոխություններ կատարելու մասին որոշման նախագիծը:
2017 թվականի նոյեմբերին «Լուսանշան» պետական ոչ առևտրային կազմակերպության կողմից Արցախի Հանրապետության Ստեփանակերտ քաղաքի Կամոյի - Դավիթ Բեկի փողոցների խաչմերուկում 5,074,291 ՀՀ դրամ հաշվեկշռային արժեքով և Թումանյան - Տիգրան Մեծ փողոցների խաչմերուկում 3,884,353 ՀՀ դրամ հաշվեկշռային արժեքով (ընդհանուր՝ 8,958,644 ՀՀ դրամ) կառուցվել են լուսացույցային օբյեկտներ, որոնք ներկայումս հաշվառված են «Լուսանշան» պետական ոչ առևտրային կազմակերպության հաշվեկշռում, սակայն լուսացույցային օբյեկտների սպասարկումը պատշաճ կարգով իրականացնելու համար նպատակահարմար է դրանք փոխանցել Արցախի Հանրապետությանը:
Ըստ նախագծի` 2018 թվականի փետրվարի 1-ի թիվ 77-Ա որոշման համաձայն «Լուսանշան» պետական ոչ առևտրային կազմակերպության գույքի կազմից ճանապարհային նշանները, լուսացուցային օբյեկտները, ինչպես նաև շարժական գույքը պետք է ամրացվի Հայաստանի Հանրապետության ոստիկանությանը: Նույն որոշման 1-ին հավելվածի ցանկում Արցախի Հանրապետության Ստեփանակերտ քաղաքում կառուցված լուսացույցային 2 օբյեկտները 8,958,644 ՀՀ դրամ արժողությամբ նշված են որպես Հայաստանի Հանրապետության ոստիկանությանը ամրացվող լուսացուցային օբյեկտներ: Հաշվի առնելով այն հանգամանքը, որ սույն նախագծով արդեն իսկ նախատեսվում է հիշյալ 2 օբյեկտները նվիրել Արցախի Հանրապետությանը, ուստի նպատակահարմար է դրանք հանել Հայաստանի Հանրապետության կառավարության 2018 թվականի փետրվարի 1-ի թիվ 77-Ա որոշման 1-ին հավելվածի ցանկից:
Նախագծով առաջարկվում է նշված գույքի տնօրինման, տիրապետման և օգտագործման իրավունքների փոխանցման ճանապարհով աջակցել Արցախի Հանրապետությանը: