Թուրքիան սիրիական Աֆրինում իր գործողություններով ցանկանում է աքսորի հարկադրել տեղի բնակիչներին. PYD համանախագահ
Սիրիայի հյուսիսում գտնվող քրդական ազգային զինված ջոկատների քաղաքական թևի՝ PYD-ի համանախագահ Շահոզ Հասանը հայտարարել է, որ Թուրքիան սիրիական Աֆրինում իր ռազմական գործողություններով ցանկանում է փոխել տարածքի ժողովրդագրական պատկերը և աքսորի հարկադրել տեղի բնակիչներին:
Ինչպես գրում է քրդական Rudaw գործակալությունը, Հասանը թուրքական ԶՈւ-ի գործողություններն Աֆրինում որակել է որպես օկուպացիա և մեղադրել Թուրքիային միջազգային իրավունքի խախտման համար:
«Սպանվել են հարյուրավոր խաղաղ բնակիչներ, որոնց թվում՝ կանայք, երեխաներ ու ծերեր: Նրանք նույնիսկ հարվածել են «Կարմիր մահիկի» շտապօգնության մեքենային»,- ասել է քուրդ գործիչը:
Թուրքիայի նախագահ Ռեջեփ Թայիփ Էրդողանն այսօր հայտարարել է, որ մինչև երեկո սիրիական Աֆրին շրջանի նույնանուն քաղաքը կարող է ամբողջովին գրավված լինել թուրքական ԶՈւ-ի կողմից:
Հիշեցնենք, որ հունվարի 20-ին թուրքական ԶՈւ-ն սկսել է Սիրիայի հյուսիսում գտնվող քրդական ազգային զինված ջոկատների (PYD/YPG) դեմ ռազմական գործողությունը, որը ստացել է «Ձիթենու ճյուղ» անվանումը: