Հանցագործությունների բացահայտման և կանխարգելման առումով Հայաստանում մեծ աշխատանք է կատարվում. Սերժ Սարգսյան
Ցանկացած երկրում հանցագործություններ տեղի են ունենում, և Հայաստանում hանցագործությունների բացահայտման և կանխարգելման առումով մեծ աշխատանք է կատարվում, «Արմենիա» հեռուստաընկերության «Բանաձև» հաղորդման ժամանակ այս մասին հայտարարել է ՀՀ Նախագահ Սերժ Սարգսյանը պատասխանելով հարցին, թե ընդհանուր առմամաբ ՀՀ Նախագահի գոհացնո՞ւմ է իրավապահ մարմինների աշխատանքը, հաշվի առնելով, որ անվտանգությունը Հայաստանի զբոսաշրջային այցաքարտնայն է:
Դիտարկմանը, որ Համաշխարհային տնտեսական ֆորումի կազմած կազմակերպված հանցագործության գլոբալ ինդեքսում Հայաստանը 2-րդն է, բայց հարևան Վրաստանը՝ 38-րդն է, իսկ Ադրբեջանը 43-րդն է, սրան գումարած տարվա ընթացքում եղել են աղմկահարույց սպանություններ հենց Երևանի կենտրոնում, Սերժ Սարգսյանը պատասխանել է.
«Նախ` պետք է ասեմ, որ ցանկացած գերատեսչության աշխատանք, նույնիսկ եթե բավարար է, կատարելագործման կարիք ունի։ Սա ոչ միայն իմ մոտեցումն է, սա նորմալ, տրամաբանական մոտեցում է: Նույն հարթության վրա չի կարելի գտնվել, մշտապես պետք է ունենալ առաջընթաց: Երկրորդ՝ պետք է ասել, որ նույնն է, ինչ քիչ առաջ ասացի. մենք զգուշավորությամբ պետք է մոտենանք տարբեր ինդեքսների, ռեյտինգների, և պետք է ասեմ` այդ նույն զեկույցում, օրինակ, զբոսաշրջության և ճանապարհորդության մասով Հայաստանի Հանրապետությունը շատ-շատ առաջ է Ձեր նշած երկրներից:
Ցանկացած երկրում, ցավոք, այդ թվում Եվրոպայում, Միացյալ Նահանգներում, իհարկե, հանցագործություններ տեղի են ունենում, տեղի են ունենում սպանություններ և այլն, ցավոք, նույնը Հայաստանի Հանրապետությունում: Խնդիրն այն է, թե որքանով է կարողանում իրավապահ համակարգը բացահայտել այդ հանցագործությունները և ամենակարևորը՝ կանխարգելել: Այս առումով, կարծում եմ, մեր երկրում մեծ աշխատանք է կատարվում, և եթե պարզ թվեր վերցնելու լինենք, օրինակ` սպանությունները մեզ մոտ տարեցտարի կրճատվում են: Այս տարի դիտավորյալ սպանությունները, թվեր չասեմ, որպեսզի շահարկումների առիթ չլինի, քանի որ տարին չի ավարտվել, մոտավորապես 15-20 տոկոսի սահմանում կրճատվել են: Տեղի ունեցած գրեթե բոլոր աղմկահարույց սպանությունները բացահայտվել են, կատարողները ձերբակալվել են: Տա Աստված, որ հասնենք այնպիսի վիճակի, որ մեր երկրում սպանություններ չլինեն, բայց որևէ երկիր հանցագործություններից ապահովագրված չէ:
Ինչ վերաբերում է Երևանի հանդարտությանը կամ անվտանգությանը, այստեղ ամենաճիշտ մոտեցումը մեր սեփական զգացողությունն է, և մեր հյուրերի կարծիքը: Լավ կլինի երեկոյան դուրս գանք, թեև հիմա դեկտեմբերի կեսն է, բայց Երևանում զբոսաշրջիկների պակաս չկա, հարցնենք, թե ինչպե՞ս է ինքը` զբոսաշրջիկն իրեն զգում Երևանում և կարո՞ղ է արդյոք գիշերը ժամը 1:00-ին, 2-ին, 3-ին, մենակ` առանց ուղեկցողի, ռեստորանից հասնել հյուրանոց: Այս առումով մեր վիճակը բավարար է, թեև մենք իրավունք չունենք հանգստանալու ձեռքբերմամբ, մենք իրոք պետք է լինենք անվտանգ երկիր՝ և՛ ներսում, և՛ մեր սահմաններին»,- ասել է Նախագահ Սերժ Սարգսյանը: