ՀՀ-ում ֆիզիկական անձանց բժշկական և դեղագործական գործունեության մասնագիտական լիցենզավորման գործընթացը դադարեցվել է 2001-ից. ԱՆ
ՀՀ –ում լիցենզավորման ենթակա են կազմակերպությունների կամ անհատ ձեռնարկատերերի կողմից բժշկական օգնության և սպասարկման իրականացումը, սակայն ոչ ֆիզիկական անձինք: Այս մասին Tert.am-ի գրավոր հարցմանն ի պատասխան հայտնել են ՀՀ առողջապահության նախարարությունից:
Tert.am-ը տեղեկություն ստանալու հարցում էր ուղարկել նախարարություն, հետևյալ հարցադրմամբ. ՀՀ «Լիցենզավորման մասին» օրենքի 37-րդ հոդվածի 1-ին մասի 3-րդ կետի համաձայն՝ բժշկի լիցենզիայի գործողությունը կարող է դադարեցվել, եթե լիցենզավորման ենթակա գործունեության իրականացման հետևանքով պատճառվել է ծանր վնաս: 2010 թվականից մինչ օրս քանի՞ հայտ է ներկայացվել լիցենզիայի դադարեցման համար և քանիսն են դադարեցվել:
Նախարարությունից պատասխանել են.«2001 թվականի մայիսի 30-ին «Լիցենզավորման մասին» ՀՀ օրենքի ընդունումից հետո, ՀՀ առողջապահության նախարարության 2001թ. սեպտեմբերի 3-ի թիվ 627 հրամանի համաձայն՝ ՀՀ-ում կասեցվել է ֆիզիկական անձանց բժշկական և դեղագործական գործունեության պետական մասնագիտական լիցենզավորման գործընթացը: «Լիցենզավորման մասին» ՀՀ օրենքի 43-րդ հոդվածի 2-րդ մասով նախատեսված աղյուսակի 3-րդ բաժնի համաձայն՝ ՀՀ–ում լիցենզավորման ենթակա են կազմակերպությունների կամ անհատ ձեռնարկատերերի կողմից բժշկական օգնության և սպասարկման իրականացումը»:
Որ բժշկական կենտրոնների և որ մասնագետների լիցենզիաներ են դադարեցվել, Առողջապահության նախարարությունը կենտրոնների վերաբերյալ հարցին չի պատասխանել:
Սակայն, վերջերս՝ քննիչը Վանաձորի բժշկական կենտրոնում 2016թ. հոկտեմբերին մահացած ծննդկան Հռիփսիմե Նազլուխանյանի գործով մեղադրյալ, ավագ մանկաբարձ-գինեկոլոգ Դավիթ Շահվերդյանի գործունեությունը ժամանակավորապես դադարեցնելու վերաբերյալ որոշում էր կայացրել, որն ուղարկել էր դատախազություն:
Դատախազությունից Tert.am-ին հայտնել էին, որ ՀՀ Լոռու մարզի դատախազությունում ուսումնասիրվել է ներկայացված որոշումը և պարզվել է, որ մեղադրյալ Դավիթ Շահվերդյանի պաշտոնավարությունը ժամանակավոր դադարեցնելու մասին դատախազի կողմից համաձայնություն տալու հիմքերը բացակայում են:
ՀՀ Լոռու մարզի դատախազ Արսեն Մարտիրոսյանը միջնորդագիր է ներկայացրել ՀՀ առողջապահության նախարարին՝ առաջարկելով քննարկել դեռևս 1997թ. ՀՀ առողջապահության նախարարի կողմից բժիշկ Դավիթ Շահվերդյանին մանկաբարձություն և գինեկոլոգիա տեսակի մասնագիտական գործունեություն իրականացնելու նպատակով տրված լիցենզիայի գործողության դադարեցման կամ կասեցման հարցը: