ԱԺ-ն ընդունեց զինծառայությունից խուսափած անձանց գումարի դիմաց պատասխանատվությունից ազատելու նախագիծը
Ազգային ժողովն այսօր երկրորդ ընթերցմամբ և ամբողջությամբ ընդունեց «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» օրենքի նախագիծը: Նախագծին կողմ քվեարկեցին բոլոր խմբակցությունները՝ 92 կողմ, 0 դեմ, 0 ձեռնպահ:
Մինչ այդ վարման կարգով խոսեց «Ելք» խմբակցության ղեկավար Նիկոլ Փաշինյանը, ով նշեց, թե իրենք խնդիր ունեն նախագծի այն փոփոխության հետ, որ մուծումների չափերն ավելանում են, կարելի է ասել՝ կրկնապատկվում: «Բայց, այնուամենայնիվ, կողմ կքվեարկենք, որպեսզի այն քաղաքացիները՝ անկախ նրանից, եթե ցանկանում են օգտվեն այս հնարավորությունից, օգտվեն և վերադառնան հայրենիք»,-ասաց նա:
Նշենք, որ նախագծի հեղինակներն առաջարկում են բանակից խուսափած և հետախուզման մեջ գտնվող այն ՀՀ քաղաքացիները, ում 27 տարին լրանում է մինչև 2017 թվականի դեկտեմբերի 1-ը, հնարավորություն կունենան ամեն բաց թողնված զորակոչի համար վճարելով 200 հազար դրամ՝ ընդհանուր առմամբ՝ 3 միլիոն 600 հազար դրամ, ազատվել քրեական հետապնդումից և անարգել վերադառնալ հայրենիք:
Օրենքում արդեն մի քանի անգամ փոփոխություն արվել է, սակայն նշենք, որ ԱԺ ամբիոնից «Հայաստանի Հանրապետական կուսակցություն» խմբակցության ներկայացուցիչները հայտարարեցին, որ հնարավորությունը վերջին անգամն է, երբ օրենքի գործողության ժամկետը երկարաձգվում է։
«Մենք մեր քաղաքացիներին ազնվորեն պետք է ասենք, որ հարգելի քաղաքացիներ, սա վերջին հնարավորությունն է, և այս հաջորդ երկու տարիների ընթացքում՝ մինչև 2019 թվականի դեկտեմբերի 31-ը, օգտվեք ընձեռված հնարավորությունից»,-ասել էր ՊՆ փոխնախարար Արտակ Զաքարյանը: