Սարգսյան–Ալիև հանդիպումն ավելի շատ պատասխան էր Ադրբեջանի սպառնալիքներին․ Ռիչարդ Կիրակոսյան
Տարածաշրջանային հետազոտությունների կենտրոնի ղեկավար Ռիչարդ Կիրակոսյանի խոսքով՝ չնայած Սարգսյան-Ալիև հանդիպումից մենք շատ քիչ ակնկալիքներ ունեինք, բայց, այնուամենայնիվ, հանդիպումը կարևոր պետք է համարել: Նա Tert.am-ի հետ զրույցում նշեց, որ հանդիպումն առավել շատ պատասխանն էր Ադրբեջանի սպառնալիքներին:
Ռիչարդ Կիրակոսյանն ուշադրություն հրավիրեց այն հանգամանքի վրա, որ հանդիպումն իրականում Ռուսաստանի դիվանագիտական քայլերից է:
«Կարևոր է վստահության չափորոշիչների ստեղծումը, որը կողմերին կվերադարձնի դեպի դիվանագիտություն»,- ասաց նա՝ հավելելով, որ հիմա կարևոր է նաև նկատել, որ վերջին մի քանի ամիսների ընթացքում սահմանում լարվածության աճ չի եղել, ինչը, ըստ նրա, նշանակում է, որ Ադրբեջանի կողմից հերթական հարձակումը հետաձգվում է մինչև գարուն:
Անդրադառնալով Ադրբեջանի նախագահի հայտարարություններին, թե իրենք չեն պատրաստվում բանակցություններին նախապայմաններ ընդունել՝ Ռիչարդ Կիրակոսյանը նշեց, որ ինքը մեծ ուշադրություն և կարևորություն չի տալիս Ալիևի ասածներին:
«Դա պարզապես Ադրբեջանի ներքին հասարակության համար հայտարարություն էր, ինչպես նաև՝ նա այդ հայտարարությունով իր դիրքերն էր փորձում ցույց տալ հանդիպումից առաջ»,- ասաց նա:
Նա համաձայնեց, որ Ռուսաստանի ներգրավվածությունը ԼՂ խնդրի կարգավորման գործընթացում ավելի մեծ է, քան ԼՂ հիմնախնդիրը կարգավորող ԵԱՀԿ Մինսկի խմբի համանախագահ այլ երկրներինը: «Բայց այս դեպքում Ռուսաստանն աշխատում է Արևմուտքի հետ, ոչ թե Արևմուտքի դեմ: Միևնույն ժամանակ պետք է կարևորել, որ ԵԱՀԿ Մինսկի խմբի ամերիկացի համանախագահն այցելեց Երևան, և որն ավելի կարևոր հանգամանք է, ԵԱՀԿ Մինսկի խմբի համանախագահության փոխարեն հիմնախնդրի կարգավորման համար այլ ֆորմատ չկա»,- ասաց նա:
Ռիչարդ Կիրակոսյանը հավանական չհամարեց Սոչիում ԱՊՀ երկրների գագաթաժողովին Պուտինի կողմից Հայաստանի և Ադրբեջանի նախագահներին որոշակի ուղղորդումներ տալը: Նա նկատեց, որ եթե անգամ ՌԴ նախագահ Պուտինը դա ցանկանար, Սոչիի գագաթնաժողովը ո՛չ վայրն էր հարմար դա անելու համար, ո՛չ էլ ժամանակը:
Վերադառնալով Հայաստանի և Ադրբեջանի նախագահների հանդիպման թեմային Ռիչարդ Կիրակոսյանը՝ նորից շեշտեց՝ այն կարևոր էր․«Քանի որ դիվանագիտությունը շատ ավելի լավ բան է, քան պատերազմը»,- ասաց նա:
Հիշեցնենք, որ այսօր ԵԱՀԿ Մինսկի խմբի համանախագահ երկրների նախաձեռնությամբ Հայաստանի և Ադրբեջանի նախագահների միջև կայացել է հանդիպում Շվեյցարիայի Համադաշնությունում՝ Ժնևում։