У Беларусі па палітычных прычынах асудзілі мінімум 35 мэдыкаў — «Вясна»
Паводле зьвестак «Вясны», дзясяткі мэдыкаў прайшлі праз затрыманьні, суды і адміністрацыйныя арышты ў «нечалавечых умовах» у беларускіх СІЗА. Шмат каго зь іх затрымлівалі проста на працоўных месцах і судзілі за «дробнае хуліганства», «непадпарадкаваньне супрацоўнікам міліцыі», «несанкцыянаванае пікетаваньне» ці за рэпосты «экстрэмісцкіх» матэрыялаў незалежных СМІ.
У выніку шматлікіх лекараў звальняюць празь іх палітычныя перакананьні, а зь некаторымі проста не падаўжаюць кантракты. З гэтай прычыны ў Беларусі назіраецца недахоп мэдычных спэцыялістаў: па стане на 11 лістапада ў краіне не хапае 4825 лекараў.
Акрамя таго, Міністэрства аховы здароўя Беларусі адклікае ліцэнзіі ў мэдычных цэнтраў. Па дадзеных «Вясны», вядома як мінімум аб дзевяці падобных выпадках. Аднак большасьць клінік, чыя праца была прыпыненая, з цягам часу аднавілі яе.
У якасьці прыкладу перасьледу мэдыкаў «Вясна» прыводзіць выпадак зь лекарамі з гарадзкога шпіталя Наваполацку, куды ў красавіку 2023 году з калёніі быў дастаўлены асуджаны на 14 гадоў кандыдат у прэзыдэнты Віктар Бабарыка. Тады на яго целе былі выяўлены пабоі. Сілавікі затрымалі пецярых лекараў, абвінаваціўшы іх у перадачы інфармацыі аб стане палітыка. Чатыры зь іх былі адпраўленыя ў турму, а пятую аштрафавалі на 3 700 рублёў.
Паводле падлікаў «Вясны», па стане на 13 лістапада палітычнымі зьняволенымі ў Беларусі прызнаны 1455 чалавек. Большасьць зь іх патрапілі пад крымінальны перасьлед пасьля прэзыдэнцкай перадвыбарнай кампаніі ў 2020 годзе, калі ў выніку фальсыфікацый уладу ў краіне захапіў Аляксандр Лукашэнка, а яго апанэнты былі вымушаныя эміграваць або атрымалі рэальныя тэрміны.