Барыс Гарэцкі: Беларусы і ўсе нашы суседзі вельмі стаміліся ад Лукашэнкі
У нашым эфіры пабываў Барыс Гарэцкі, намеснік старшыні Беларускай Асацыяцыі Журнаслістаў.
РР: Уначы з’явілася цікавая інфармацыя. Твітар Валерыя Цапкалы паведаміў пра крытычны стан Лукашэнкі, які знаходзіцца ў цэнтральнай клінічнай больніцы ў Маскве. Гэты твіт сабраў 3 мільёны 400 тысяч праглядаў. Што ты наконт гэтага думаеш?
– Я не стаўлюся да Валерыя Цапкалы сурʼёзна і ніколі не ставіўся. Ягоныя твіты не чытаю, таму такую неправераную інфармацыю каментаваць не хачу. Усім вядома вельмі хацелася б, каб у Беларусі адбыліся перамены, усім гэтага хочацца. Некалькі тыдняў мы абмяркоўвалі стан Лукашэнкі, прычым гэта нават у Літве калі абмяркоўваеш беларускія падзеі, кожны другі табе скажа: «О, у вас зʼявілася надзея!». Гэта ўласцівасць грамадства, але мне хацелася б, каб сапраўды гэтыя перамены адбыліся. З другога боку ясна, што калі ўжо шмат гадоў, то скажам як у Бібліі: Бог, калі нейкія дзверы зачыніў, то яны будуць зачыненыя. Таму калі твая эпоха ўжо сышла, то ўсё. Канешне, ты можаш чапляцца сінімі пальцамі, яшчэ некалькі годзікаў чапляцца «у руля», але эпоха ўжо сышла.
РР: І новыя дзверы адчыняцца ўжо для іншых людзей, так? У выпадку Валерыя Цапкалы гэта проста хайп цяпер?
– Я не ведаю, я не стаяў з градуснікам. Я не ведаю, што Цапкала ведае. Таму з такім жа поспехам я магу заўтра выпусціць твіт, што з Лукашэнкам нешта здарылася.
РР: Проста тэма вельмі спекулятыўная, і любое падобнае паведамленне, нават непацверджанае можа выклікаць рэзананс, так?
– Абсалютна, гэта ўжо не раз бывала. Беларусы вельмі стаміліся ад Лукашэнкі, зямля вельмі стамілася ад Лукашэнкі. Балтыйскія краіны, Польшча, Беларусь, Украіна вельмі стамілася ад Лукашэнкі. Таму кожная такая інфармацыя настройвае людзей, што можа быць іх адчуванні адбудуцца.
РР: Але прыгадаем, з чаго пачаўся гэты тыдзень – Раман Пратасевіч, палітзняволены журналіст. Ён паведаміў, што памілаваны Лукашэнкам, і падзякаваў яму за гэта. Цяпер ён не будзе адпраўлены на 8 гадоў у калонію. Як ты сустрэў гэтую навіну? Наколькі яна была нечаканая ці наадварот?
– Абсалютна чаканая. Мы нават галасавалку на тг-канале Беларускай Асацыяцыі Журналістаў паставілі, у нас ёсць такая традыцыя па вечарах пытаць нешта ў нашых падпісчыкаў. Большасць прагаласавала яшчэ да гэтага рашэння, калі быў вынесены прысуд, што Пратасевіч не паедзе адбываць сваё пакаранне, што ён будзе памілаваны, ці адбудзецца нешта падобнае. Ясна, што прыклад такіх людзей як Пратасевіч патрэбны уладам. Улады хочуць, каб людзі змянялі сваё меркаванне, гралі пад дудку спецслужбаў. 60-70 адсоткаў я даваў верагоднасці, што Пратасевіча памілуюць. Ясна, што для яго была небяспека, што ўлада выкарыстае яго як патрачаны матэрыял. Яны яго захапілі, яны 2 гады ім карысталіся, прымушалі яго ўздзельнічаць у прапагандысцкіх мэтах. Альбо не прымушалі, можа ён сам запісаўся ў БРСМ, і ходзіць з чырвона-зялёным сцяжком, абвінавачваючы ва ўсім сваю дзяўчыну. Але такая верагоднасць была.
Цалкам размову слухайце ў далучаным файле:
Беларускае Радыё Рацыя
Artykuł Барыс Гарэцкі: Беларусы і ўсе нашы суседзі вельмі стаміліся ад Лукашэнкі pochodzi z serwisu БЕЛАРУСКАЕ РАДЫЁ РАЦЫЯ.