Вячаслаў Сікора: Мой фільм – пра нязломнасць духу ўкраінцаў

23.05.2023 18:28

"Госць Рацыі" - беларускі рэжысёр Вячаслаў Сікора.

Artykuł Вячаслаў Сікора: Мой фільм – пра нязломнасць духу ўкраінцаў pochodzi z serwisu БЕЛАРУСКАЕ РАДЫЁ РАЦЫЯ.

„Госць Рацыі” – беларускі рэжысёр Вячаслаў Сікора. У прамым эфіры паразмаўлялі з нашым госцем пра дапамогу беларускім добраахвотнікам, пра ягоны фільм “Руzzкий мир”, адмысловы тэлеграм-канал для прамоцыі гэтай стужкі, новы праект “72 часа” ды іншае.

РР: Толькі рэжысёр ці можа таксама і валанцёр? Бо зараз Вы вельмі заангажаваныя ўкраінскім справамі.

Вячаслаў Сікора: А хіба не можа быць валанцёр і рэжысёр у адной асобе? Менавіта прафесія рэжысёра мне дапамагае шмат рабіць на валанцёрскай глебе. Менавіта дзякуючы таму, што я зняў фільм “Руzzкий мир”, людзі, паглядзеўшы яго, сталі напрамую звяртацца да мяне, прапануючы дапамогу. Акрамя таго, што я здымаю кіно – мастацкае, дакументальнае пра вайну, я пастаянна езджу ва Украіну. І мне людзі пішуць і пытаюцца, куды заплаціць за прагляд фільму? І людзі данацяць, мы гэтыя грошы збіраем, купляем неабходнае. Сёння мне даслалі падзяку ад Палка Каліноўскага. Мы ім адправілі “глушылкі” супраць дронаў. Тое што просяць, тое і дасылаем. У тым ліку і на аперацыі вайскоўцам.

РР: Створаны адмысловы тэлеграм-канал, ён так і называецца “Руzzкий мир” для прамоцыі гэтага кіно. Навошта?

Вячаслаў Сікора: Фільм немагчыма выкласці ў адкрытым доступе ў сацсетках. Яго адразу блакуюць за шакуючы кантэнт. Кантэнт, у якім Україна жыве ўжо паўтара года, для міравой супольнасці, асабліва для тых, хто адказвае за сацсеткі, – гэта ўсяго толькі шакуючы кантэнт. Таму тэлеграм – гэта адзіная платформа, дзе я спакойна змог выкласці стужку ў адкрытым доступе для ўсіх гледачоў. Толькі для гэтага і стварыў тэлеграм. Там выкладзены ўвесь фільм і закрытыя спасылкі ёсць на Ютуб. У стужцы “Руzzкий мир» жорсткія сцэны ёсць – забойствы, трупы, гэта кадры з тэлефонаў забітых расейскіх акупантаў. Фільм ёсць на тэлеграм-канале ў добрай якасці. І я бачу, што за апошнія 10 дзён яго паглядзела больш за паўмільёна чалавек.

РР: “72 часа” – новы праект. Пра што гэта?

Вячаслаў Сікора: Гэта не новы праект. Я быў на Майдане ў 2014 годзе і здымаў, камера не выключалася. Але я не ведаў, куды той матэрыял прымяніць. І ён у мяне ляжаў. І вось, калі пачалася вайна, я зразумеў, для чаго я яго здымаў. І я зрабіў фільм “72 часа”. Пра тое, як мой герой у першы дзень, 24 лютага, калі пачуў, што пачалі бамбіць з беларускай тэрыторыі Украіну, едзе на вайну. І пакуль едзе, узгадвае, як гэта было ў 2014 годзе, калі ён ехаў на Майдан. Я зняў стужку пра нязломнасць духу ўкраінцаў. Пра тое, што ўкраінцы ніколі не прайграюць. А Расея зрабіла страшэнную памылку.

Цалкам гутарку слухайце ў далучаным гукавым файле: