Агляд прэсы: «Новая Беларусь», напады ў Чарнагорыі і ЗША
Польскі Newsweek пра «Новую Беларусь», у Чарнагорыі мужчына адкрыў агонь па людзях на вуліцы, як мінімум 11 загінулі, у Нью-Ёрку напалі на пісьменніка Салмана Рушдзі.
Artykuł Агляд прэсы: «Новая Беларусь», напады ў Чарнагорыі і ЗША pochodzi z serwisu БЕЛАРУСКАЕ РАДЫЁ РАЦЫЯ.
Польскі Newsweek пра «Новую Беларусь», у Чарнагорыі мужчына адкрыў агонь па людзях на вуліцы, як мінімум 11 загінулі, у Нью-Ёрку напалі на пісьменніка Салмана Рушдзі, ударылі нажом у шыю, падрабязнасці ў аглядзе сусветнай прэсы ад Антона Разумоўскага.
Канферэнцыя «Новая Беларусь», якую арганізаваў офіс Святланы Ціханоўскай у Вільні, — гэта спроба аднавіць агульны фронт і выпрацаваць новую стратэгію барацьбы з рэжымам Лукашэнкі, піша польскі часопіс Newsweek. Паводле аўтараў артыкула, жнівень 2020 года быў часам сацыяльнай эйфарыі і вялікай надзеі ў Беларусі. Лукашэнка зноў сфальсіфікаваў выбары, але гэтым разам беларусы былі гатовыя адстойваць свой рэальны вынік галасавання, таму пачалі выходзіць на шматтысячныя мірныя дэманстрацыі не толькі ў Менску, але і ў іншых гарадах. Да таго ж падзеі ва Украіне ўплываюць на ўспрыманне палітычнай барацьбы беларусаў. Вайна перастае табуяваць варыянт сілавога рашэнне выйсця з крызісу, прынамсі, для пэўнай часткі прадстаўнікоў беларускага дэмакратычнага руху. Па-рознаму называецца і галоўны вораг, з якім даводзіцца змагацца. Падчас дыскусій у Вільні гэты варыянт агучыў Вадзім Пракоп’еў, заснавальнік палка «Пагоня». Незалежна ад ацэнкі падзей беларускага жніўня 2020 года і дзейнасці Святланы Ціханоўскай у ролі беларускага дэмакратычнага лідара, несумненна адно: калі б не прэзідэнцкія выбары два гады таму і масавыя пратэсты па ўсёй краіне, сёння было б цяжка каго-небудзь пераканаць у тым, што ёсць такая краіна, як Беларусь, – чытаем у свежым выданні польскага Newsweek.
У чарнагорскім горадзе Цэцінье ў пятніцу днём невядомы адкрыў стральбу па людзях у спальным раёне, ёсць загінулыя і параненыя. Пра гэта паведамляюць мясцовыя выданні RTV Cetinje і Vijesti.
Адзначаецца, што інцыдэнт адбыўся каля 16:00 па мясцовым часе — тады мужчына раптам адкрыў агонь па мінаках. У выніку страляніны загінулі як мінімум 11 чалавек і яшчэ шасцёра атрымалі раненні, у тым ліку дзеці. У гэты час у Цэцінье сабраўся маладзёжны лагер.
Вядома, што адзін з паліцэйскіх атрымаў раненне ў галаву, а як мінімум двух чалавек, пажылую жанчыну і мужчыну, перавезлі ў клінічны цэнтр Чарнагорыі. Нападнік загінуў — ці падчас перастрэлкі з паліцыяй, ці застрэліўся сам. Паводле звестак партала In4s, гэта 34-гадовы мясцовы жыхар Вучка Барылавіч. Прычынай страляніны стала, верагодна, сямейная сварка.
У Нью-Ёрку невядомы напаў з нажом на брытанскага пісьменніка, лаўрэата Букераўскай прэміі Салмана Рушдзі, чые кнігі ў Іране забароненыя, а сам ён больш за 30 гадоў быў завочна прысуджаны да пакарання смерцю. Як піша The Times, нападніка затрымалі, пра стан Рушдзі пакуль няма вестак. Рушдзі падвергнуўся нападу, калі збіраўся прачытаць лекцыю ў Інстытуце Чаўтакуа ў Нью-Ёрку. Па словах відавочцаў, на сцэну выбег мужчына з нажом і пачаў «біць або калоць» пісьменніка. Нападнік затрыманы. Паліцыя штата Нью-Ёрк паведаміла, што Рушдзі атрымаў нажавое раненне ў шыю і быў дастаўлены на верталёце ў шпіталь. Салман Рушдзі — брытанскі пісьменнік індыйскага паходжання. Ягоны раман «Сатанінскія вершы», які выйшаў у 1988 годзе, выклікаў пратэст у мусульманскім свеце, бо адзін з персанажаў спісаны з прарока Мухамеда.
Беларускае Радыё Рацыя
Artykuł Агляд прэсы: «Новая Беларусь», напады ў Чарнагорыі і ЗША pochodzi z serwisu БЕЛАРУСКАЕ РАДЫЁ РАЦЫЯ.