„Ястрабы” абыгралі „Белсталь” і заваявалі кубак Цыплакова
Форвард пераможцаў Ціхан Баразна стаў адзіным хакеістам, якому двойчы пакарыўся Кубак Цыплакова.
Artykuł „Ястрабы” абыгралі „Белсталь” і заваявалі кубак Цыплакова pochodzi z serwisu БЕЛАРУСКАЕ РАДЫЁ РАЦЫЯ.
У фінальным матчы, які прайшоў у Пінску, мясцовыя „Ястрабы” перамаглі жлобінскую „Белсталь” і выйгралі Кубак Цыплакова, паведамляе hockey.by. Да трэцяга перыяду гульня была поўнасцю роўнай. Як толькі адна каманда выходзіла наперад, яе адразу ж даганяла іншая. Ключавым для пінчукоў стаў трэці перыяд. На гэтым адрэзку вырашальнага паядынку „Ястрабы” змаглі забяспечыць сабе задзел у дзве шайбы 5:3. Варта адзначыць, што форвард пераможцаў Ціхан Баразна стаў адзіным хакеістам, якому двойчы пакарыўся Кубак Цыплакова. Летась ён яго выйграў у складзе „Мінскіх зуброў”.
Лапко выйшла ў паўфінал турніру ІТФ у Польшчы
Беларуска Вера Лапко, якая мае 324-ы нумар рэйтынгу
ATP выйшла ў паўфінал турніру ІТФ у польскім Радаме. У матчы 1/4 фіналу яна абыграла 494-ю ракетку планеты францужанку Эстэль Кашына — 6:2, 3:6, 7:6. Наступнай суперніцай Лапко стане 430-я у сусветным рэйтынгу іспанка Карлота Марцінес Сірэс.
«Тарпеда» разграміла „Энергетык-БДУ”
Футбалісты жодзінскага „Тарпеда-БелАЗа” разграмілі „Энергетык-БДУ” з лікам 4:0 у хатнім матчы чэмпіянату Беларусі. Паядынак у Жодзіне склаўся нечакана лёгка для гаспадароў, якія чатыры разы забілі аднаму з лідэраў нацыянальнага першынства. Галявы дубль аформіў Яўген Шаўчэнка, яшчэ па мячу забілі Мікіта Пацко і Аляксей Анцілеўскі. Таксама гарадзенскі «Нёман» перамог „Слуцк”. Ягор Зубовіч на 64 хвіліне рэалізаваў пенальці. Сёння футбалісты „Іслачы” ў Маладзечне будуць супернічаць з аўтсайдэрам берасцейскім „Дынама”, „Менск” на полі сталічнага стадыёна „Трактар” прыме гасцей з „Віцебска”, а ў Мазыры мясцовая „Славія” згуляе з „Гомелем”.
„Севілья” з паразы стартавала ў чэмпіянаце Іспаніі
Футбалісты „Севільі” саступілі „Асасуне” ў стартавым матчы чэмпіянату Іспаніі. У пераможцаў галы на рахунку Чымі Авіла і Аймара Ораса, які змог рэалізаваць пенальці на 74-й хвіліне матча. У складзе „Севільі” вызначыўся Рафаэль Мір. Дортмундская Барусія ў матчы другога тура чэмпіянату Германіі нанесла паразу Фрайбургу. Прапусціўшы мяч на 35-й хвіліне ўсе тры свае галы дортмундцы правялі ў апошняй пятнаццаціхвілінцы.
Месі ўпершыню з 2005 года не намінаваны на „Залаты мяч”
Апублікаваны спіс з 30 прэтэндэнтаў на „Залаты мяч”. Гэты прыз штогод уручаецца найлепшаму футбалісту свету. Сёлета ўпершыню з 2005 года ў лік 30 прэтэндэнтаў не ўвайшоў дзейны ўладальнік „Залатога мяча”, форвард „ПСЖ” Ліянэль Месі. Ён атрымліваў „Залаты мяч” сем разоў — гэта сусветны рэкорд. Затое ў спісе прэтэндэнтаў ёсць Крышціяну Раналду. Ён трапляе ў гэты лік таксама з 2005 года — то бок, 18-ы раз запар. У 37-гадовага Раналду пяць „Залатых мячоў” — гэта другі вынік пасля Ліянэля Месі.
Беларускае Радыё Рацыя
Artykuł „Ястрабы” абыгралі „Белсталь” і заваявалі кубак Цыплакова pochodzi z serwisu БЕЛАРУСКАЕ РАДЫЁ РАЦЫЯ.