ААН: Дзеянні ўладаў Беларусі нацэленыя на падаўленне крытыкі

Па даручэнні Савета па правах чалавека ААН Мішэль Бачэлет сумесна з камандай міжнародных экспертаў вывучае становішча спраў у галіне правоў чалавека ў Беларусі.

Вярхоўны камісар ААН па правах чалавека Мішэль Бачэлет заявіла, што дзеянні беларускіх уладаў па абмежаванні правоў чалавека і свабодаў у краіне нацэленыя на падаўленне крытыкі.

Па даручэнні Савета па правах чалавека ААН Мішэль Бачэлет сумесна з камандай міжнародных экспертаў вывучае становішча спраў у галіне правоў чалавека ў Беларусі. У сваім выступе на 48-й сесіі Савета па правах чалавека ў Жэневе, Мішэль Бачэлет прадставіла прамежкавыя высновы даследавання — і адзначыла галоўную выснову: сітуацыя з правамі чалавека ў Беларусі ў 2021 годзе працягнула пагаршацца, піша ej.by.

Як распавяла Вярхоўны камісар ААН па правах чалавека, цяпер больш за 650 чалавек у Беларусі знаходзяцца ў зняволенні з-за сваіх перакананняў — у тым ліку прадстаўнікі апазіцыі, праваабаронцы, журналісты, удзельнікі пратэстаў і актывісты, уключаючы кіраўнікоў праваабарончага цэнтра «Вясна» (па апошніх даных праваабаронцаў, у краіне ўжо 685 палітвязняў. – Заўв. рэд.). Дакладчыца асабліва вылучыла «пастаянныя сцвярджэнні аб шырокім распаўсюджванні і сістэматычным прымяненні катаванняў і жорсткага абыходжання ў кантэксце адвольных затрыманняў і арыштаў пратэстоўцаў».

„Я глыбока занепакоеная ўзмацненнем жорсткасці абмежаванняў, якія тычацца грамадзянскай прасторы і асноўных свабод, у тым ліку аперацыямі паліцыі супраць арганізацый грамадзянскай супольнасці і незалежных СМІ, арыштамі і крымінальным пераследам актывістаў, якія выступаюць у абарону правоў чалавека, а таксама журналістаў паводле абвінавачванняў, якія звычайна здаюцца палітычна матываванымі», — адзначыла Бачэлет.

Асаблівую ўвагу камісар ААН надала уціску СМІ ў Беларусі. Па яе даных, толькі ў 2020 годзе ў краіне было затрымана не менш за 497 журналістаў і супрацоўнікаў СМІ, 68 з іх падвергліся жорсткаму абыходжанню. У 2021 годзе мэтанакіраваныя дзеянні супраць журналістаў працягнуліся. Паводле звестак на 10 жніўня 2021 года, 27 журналістаў заставаліся ў зняволенні.

Сур’ёзнай праблемай Бачэлет назвала і фактычнае знішчэнне грамадзянскай супольнасці ў Беларусі. Па даных ААН, 129 арганізацый грамадзянскай супольнасці ў Беларусі былі зачыненыя або знаходзяцца ў працэсе ліквідацыі. Сярод іх ёсць нават шматгадовыя партнёры ААН па абароне правоў чалавека.

„Узровень і мадэль паводзінаў беларускіх уладаў на сённяшні дзень дазваляюць з вялікай доляй верагоднасці выказаць здагадку, што абмежаванні свабодаў выказвання і сходаў, а таксама правоў чалавека маюць на мэце, у першую чаргу, здушыць крытыку і аказаць ціск на нязгодных з палітыкай урада і ніяк не звязаныя з якімі-небудзь легітымнымі мэтамі, апісанымі ў заканадаўстве па правах чалавека, напрыклад, абаронай грамадскага правапарадку», — канстатавала Бачэлет.

Паводле ej.by