Карантын у Літве будзе доўжыцца да 31 студзеня: зачыняюцца крамы, забараняецца неабавязковае перамяшчэньне

Новы ўрад на пазачарговым пасяджэньні падоўжыў карантын у Літве да 31 студзеня. З серады будуць зачыненыя большасьць крам, за выключэньнем харчовых, абмяжоўваецца выхад людзей з дому бяз важнай прычыны, інфармуе DELFI.


Сем’ям будуць дазволеныя шпацыры на сьвежым паветры ў межах тэрыторыі самакіраваньня, без сустрэч зь іншымі людзьмі.


Акрамя харчовых крам таксама працягнуць працу аптэкі, вэтэрынарныя крамы, оптыкі і крамы артапэдычных тавараў. У іх на аднаго чалавека павінна быць 10 кв. мэтраў. Таксама будуць працаваць месцы выдачы тавараў інтэрнэт-гандлю.




З 15 сьнежня па 3 студзеня абмежаваны выезд асоб за межы тэрыторыі самакіраваньня, у якім яны жывуць, за выключэньнем выпадкаў, зьвязаных са сьмерцю блізкіх сваякоў або працы, калі месца працы знаходзіцца ў іншым самакіраваньні, або ў сувязі з атрыманьнем неабходнай мэдычнай дапамогі.


Забароненыя блізкія кантакты з членамі больш чым адной сям’і або хатняй гаспадаркі.




Члены ўраду падкрэсьлілі, што цяпер варта адкласьці розныя асабістыя сьвяты або любыя іншыя сходы.


Карантын будзе доўжыцца да 31 студзеня. Гэтыя зьмены ўступяць у сілу ў сераду, 16 сьнежня.